Rússar geti farið heim með skriðdrekana sína óttist þeir um þá

Slík skotfæri voru hönnuð á tímum kalda stríðsins og þá sérstaklega til að granda skriðdrekum Sovétríkjanna. Rýrt úran er mjög þéttur og þykkur málmur sem gerir hann kjörinn í skot skriðdreka. Það þarf mikið til að stöðva hann og á þeim hraða sem honum er skotið úr fallbyssum skriðdreka, hitnar hann mjög, sem gerir hann enn betri í að fara í gegnum brynvarnir.

Rússar hafa brugðist reiðir við en Sergei Lavrov, utanríkisráðherra Rússlands, sagði til að mynda að um stigmögnun væri að ræða.

Kirby var spurður út í málið á blaðamannafundi í Hvíta húsinu í gær. Hann sagði skotfæri sem þessi hafa verið notuð í áratugi. Rússar væru að reka fleyg í gegnum enn einn strámanninn.

„Það sem ég held að sé að gerast hér er að Rússar vilja einfaldlega ekki að Úkraínumenn haldi áfram að granda skriðdrekum þeirra og gera þá óvirka,“ sagði Kirby.

Hann bætti við að einföld lausn væri í boði. Rússar gætu flutt skriðdreka sína aftur til Rússlands, frá Úkraínu. Þeir ættu yfir höfuð ekki að vera þar.

„Það væri mín ráðlegging ef þeir hafa áhyggjur af skriðdrekunum sínum,“ sagði Kirby.

Áhugasamir geta séð tilheyrandi svör Kirbys á blaðamannafundinum í gær í spilaranum hér að neðan. Myndbandið er ekki textað og er töluð enska.

Kirby var einnig spurður út í það hvort ríkisstjórnin teldi einhverjar vendingar hafa átt sér stað varðandi þann möguleika að Kínverjar færu að senda vopn til Rússlands. Hann sagði svo ekki vera.

Bandaríkjamenn hafa haldið því fram um nokkuð skeið að ráðamenn í Kína hafi íhugað að senda Rússum vopn og skotfæri en ráðamenn á Vesturlöndum hafa haft miklar áhyggjur af því.

Bæði Rússar og Úkraínumenn eru sagðir eiga við skort á skotfærum fyrir stórskotalið að etja en slík vopn hafa skipt sköpum í átökunum í Úkraínu. Sérfræðingar eru sammála um það að aðgengi að stórskotaliðsvopnum og skotfærum fyrir þau vopn séu gífurlega stór liður í átökunum og muni skipta sköpum fyrir framvindu stríðsins.

Rússar skjóta meira af sprengikúlum en þeir geta framleitt og það sama á við Úkraínumenn og framleiðslugetu bakhjarla þeirra.

Ríki Evrópusambandsins eru að leggja mikið kapp í að auka framleiðslu á sprengikúlum. enda hefur stríðið í Úkraínu sýnt fram á verulega vankanta á getu Evrópu til að framleiða hergögn. Það hefur samt reynst erfitt.

Financial Times sagði frá því nýverið (áskriftarvefur) að þótt ESB dældi peningum í kaup á skotfærum hefði það að mestu leitt til hærra verðs en ekki aukinnar framleiðslu.

Það hefur að miklu leyti verið rakið til þess að framleiðendur skotfæra vantar hráefni eins og byssupúður, TNT og annað sem til þarf. Því gæti það reynst mjög erfitt að auka framleiðsluna á skömmum tíma. Einn viðmælandi FT sagði að það myndi líklega taka þrjú ár.

Forsvarsmaður eins stærsta skotfæraframleiðenda Spánar sagði að hráefnin skorti vegna þess að allar verksmiðjur heimsins væru keyrðar á fullum afköstum þessa dagana.