Fótbolti

Alfreð skoraði fyrir Lyngby og Hákon fyrir FCK

Hjörtur Leó Guðjónsson skrifar
Alfreð Finnbogason heldur áfram að skora fyrir Lyngby.
Alfreð Finnbogason heldur áfram að skora fyrir Lyngby. Vísir/Getty

Alfreð Finnbogason heldur áfram að skora mikilvæg mörk fyrir Lyngby í dönsku úrvalsdeildinni, en hann skoraði eina mark liðsins í 1-1 jafntefli gegn Horsens í dag. Þá skoraði Hákon Arnar Haraldsson fyrra mark FCK í 2-1 sigri gegn Viborg.

Alfreð kom Lyngby í forystu á 24. mínútu leiksins áður en gestirnir jöfnuðu um miðjan síðari hálfleik. Íslendingarnir þrír, þeir Alfreð Finnbogason, Sævar Atli Magnússon og Kolbeinn Finnsson, voru allir í byrjunarliði Lyngby í dag, en með stiginu lyfti liðið sér upp úr botnsæti deildarinnar.

Lyngby situr nú í 11. sæti deildarinnar með 16 stig þegar venjulegri deildarkeppni er lokið og deildinni verður nú skipt upp í efri- og neðri hluta.

Þá var Hákon Arnar Haraldsson einnig á skotskónum er FCK vann 2-1 sigur gegn Viborg. Hákon kom liðinu í forystu strax á 13. mínútu áður en hann var tekinn af velli á seinustu mínútu venjulegs leiktíma. Ísak Bergmann Jóhannesson var ekki í leikmannahópi FCK.

Kaupmannahafnarliðið situr í öðru sæti dönsku deildarinnar með 42 stig, einu stigi minna en topplið Nordsjælland.

Danski boltinn Fótbolti

Mest lesið


Fleiri fréttir

Sjá meira


×

Mest lesið