„Eitthvað sem gerist með aldrinum að þú endist ekki eins lengi“

„Náttúrulega hefðu ýmsir hlutir þurft að ganga upp hjá okkur, einhverjir hlutir sem við tókum sénsa á sem gengu kannski ekki alveg. En við fengum fullt af frammistöðum fyrir leikinn á móti Georgíu sem er aðalleikurinn. Tryggvi sýnir hvað hann er frábær og Jón Axel líka. Þeir voru alveg á pari við alla Spánverjana hér í kvöld þessir tveir. Hjálmar kemur inn og grípur tækifærið og sýnir að hann geti verið í þessu hlutverki, hávaxinn, með langar hendur og góður varnarmaður. Það er gott að hafa svoleiðis menn og það var alveg margt jákvætt.“

Leikurinn í kvöld var merkilegur fyrir Hlyn fyrir þær sakir að þetta var hans fyrsti leikur með landsliðinu í að verða fjögur ár. Hann lagði landsliðsskóna á hilluna árið 2019, en dustaði rykið af þeim eftir símtal frá Craig Pedersen, þjálfara liðsins.

„Mér leið bara furðuvel. Í einvígjum og öllu því fannst mér ganga bara ágætlega. Ég þurfti heldur ekki að hafa áhyggjur af því að vera of lengi inná og það er eitthvað sem gerist bara með aldrinum að þú endist ekki eins lengi. En það er allt í lagi og ég reyndi bara að gera mitt besta. Ég hefði viðljað setja eitt af þessum skotum sem ég tók, en það er ekki við það ráðið alltaf.“

„Ég vildi bara koma með þannig hugarfari að ég vildi bara gera mitt besta. Ég var bara tilbúinn að koma aðeins og hvíla Tryggva og koma með öðruvísi vídd. Það vita það allir að við viljum hafa hann sem allra mest inná, en þessar fáu mínútur sem hann þarf að hvíla, ef þeim vantar þetta þá bara geri ég það.“

Þá fór Hlynur einnig stuttlega yfir leik spænska liðsins, sem er ógnarsterkt þrátt fyrir að stilla upp hálfgerðu varaliði í leik kvöldsins.

„Þeir spila mjög aggresívt út á bakverðina okkar og loka alveg á okkur. En þó að það vanti mikið í þetta spænska lið þá vantar auðvitað töluvert í okkar lið líka. Þessi þjóð er bara mikil körfuboltaþjóð og með mikla breidd. Þetta eru allt strákar sem eru að spila í mörgum af betri liðum Spánar og þeim flokki.“

„Það er ekkert auðvelt og þú fattar í svona leik að ef þú ert aðeins of lengi að taka boltann upp ertu blokkaður og ef þú tekur ekki skotið þitt strax þá hefurðu ekki tíma. Það er alls staðar minni tími til að gera allt miðað við annars staðar. Ef þú nýtir ekki þessar litlu glufur þá geturðu litið illa út.“

Að lokum var Hlynur spurður stuttlega út í næsta leik Íslands þegar liðið fer til Georgíu og mætir þar heimamönnum næstkomandi sunnudag í hreinum úrslitaleik um sæti á HM. Hann segir að leikurinn í kvöld sé nokkuð gott veganesti í þann leik.

„Ég er allt í lagi sáttur við margt. Þetta hefði ekki þurft að enda í tuttugu [stiga tapi] og það var alveg augnablik þar sem var tíu stiga munur og Hilmar tekur tvö skot sem hefðu getað snúið þessu okkur í hag.“ 

„En þetta er alls ekkert alslæmt, en auðvitað hefðum við getað gert betur. Hins vegar var öll okkar rótering, hvernig liðinu var stillt upp og undirbúningurinn þannig, og það er ekkert leyndarmál, að hugurinn er meira við Georgíuleikinn. Það er svoleiðis. við förum bara í Kákasusfjöllin og klárum þetta,“ sagði Hlynur að lokum.