Inter styrkti stöðu sína í öðru sæti

Inter vann 3-1 sigur á Udinese í síðasta leik dagsins í Serie A, ítölsku úrvalsdeildinni í knattspyrnu. Sigurinn lyftir Inter þremur stigum upp fyrir nágranna sína í AC Milan í töflunni.

Heimamenn í Inter fengu vítaspyrnu þegar rétt rúmlega stundarfjórðungur var liðinn af leiknum. Það tók sinn tíma að dæma spyrnuna en á endanum komst dómarateymið að því að um brot hefði verið að ræða.

Romelu Lukaku fór á punktinn og brenndi af en fékk hins vegar að taka spyrnuna aftur og brást bogalistin í annað sinn. Undir lok fyrri hálfleiks jöfnuðu gestirnir hins vegar metin. Sandi Lovric skoraði þá eftir sendingu Roberto Pereyra og staðan jöfn í hálfleik.

Staðan var jöfn allt þangað til á 73. mínútu þegar Henrikh Mkhitaryan skoraði með góðu skoti og kom Inter aftur yfir. Lautaro Martínez gulltryggði svo sigurinn þegar aðeins mínúta var til loka venjulegs leiktíma.

Lokatölur á San Siro 3-1 Inter í vil sem er nú með 47 stig í 2. sæti Serie A. Napoli trónir hins vegar á toppnum með 62 stig á meðan AC Milan er í 3. sæti með 44 stig.