Stjórnarandstaðan vill sjá á spilin: „Mér er gjörsamlega misboðið“

Arndís Anna Kristínardóttir Gunnarsdóttir, þingmaður Pírata, lýsti yfir vonbrigðum með tillöguna um að lengja þingfundinn en hún sagði slíkt verða til þess að þingfundur myndi líklega standa fram á nótt. Þannig myndu eflaust margir ekki hafa tök eða vilja til að taka þátt í umræðunni. 

„Markmið mitt með þeirri umræðu sem á sér stað hér er að ræða frumvarpið vegna þess að ég mun ekki sofa rótt yfir því að þessi lög verði samþykkt nema ég viti með fullri vissu að fólk geri sér grein fyrir því hvað það er að samþykkja, því að ég efast í alvörunni um það. Mig langar til þess að eiga þetta samtal. Ég óska þess að við getum rætt þetta á eðlilegum tíma þegar við mætum öll hérna og erum öll hérna,“ sagði Arndís Anna.

Þingmenn Pírata fóru aftur á móti fram á að hlé yrði gert á annarri umræðu og málinu tekið fyrir í nefnd til að ræða fyrirhugaðar breytingar stjórnarliða. Það geti ekki beðið til þriðju umræðu. 

„Til þess að við getum átt efnislega umræðu hér í annarri umferð þá hljótum við að eiga heimtingu á að sjá á spilin, sjá hvað felst í þessum tillögum. Ef þær eru þá yfir höfuð eitthvað sem stjórnarliðar geta náð saman um er eðlilegt að mæta með þær í aðra umræðu þannig að við getum rætt þær, frekar en að ýta þessu á undan sér og koma síðan kannski ekki með neitt í þriðju umræðu,“ sagði Andrés Ingi.

„Hvaða vinnubrögð eru þetta eiginlega?“

Þetta tók Helga Vala Helgadóttir, þingmaður Samfylkingarinnar, undir en fordæmi væru fyrir því að slíkt væri gert, sérstaklega þegar málin væru komin í hnút. Stjórnarliðar hafi ekki kynnt neinar breytingar þrátt fyrir heila viku af umræðum. 

„Þau vilja ekki upplýsa þingið um það hvaða breytingum þetta frumvarp kemur til með að taka í nefndinni. Hvernig er hægt að ætlast til þess að umræða hérna verði lýðræðisleg og efnisrík þegar þau halda bara einhverri leynd yfir þessum mögulegu breytingum. Hvaða vinnubrögð eru þetta eiginlega?,“ sagði Helga Vala.

Þá bar á góma að um tafir væri að ræða af hálfu stjórnarandstöðunnar en Björn Leví Gunnarsson, þingmaður Pírata, benti á að aðeins vika væri liðin af þinginu eftir áramót. 

„Það er meiri hlutinn sem fer með dagskrárvaldið, tekur mál sem eru með endalaust mikið af neikvæðum umsögnum sem er ekkert brugðist við og ætlast til að það sé ekki talað um það. Auðvitað verður talað um allar þessar neikvæðu umsagnir sem meiri hlutinn er ekki að gera neitt við. Þess vegna, þegar ríkisstjórnin setur þetta mál sem fyrsta mál á dagskrá, tekur það þann tíma sem það þarf að taka. Ef sagt er að það sé að tefja önnur mál þá á bara að setja önnur mál fyrst á dagskrá,“ sagði Björn Leví.

Mikið svigrúmhafi verið til umræðu og komið til móts við minnihlutann

Bryndís Haraldsdóttir, þingmaður Sjálfstæðisflokksins og formaður allsherjar- og menntamálanefndar, tók upp varnir og vildi að því væri haldið til haga að frumvarpið hafi komið fram síðasta vor en samið um að það færi á dagskrá í haust. Fyrir jól hafi síðan verið samið um að málið kæmi aftur til umræðu í nefndaviku í upphafi árs. Þau hafi boðað framhaldsnefndarálit til að bregðast við gestakomum og ábendingum. 

„Þetta er mjög skýrt og það er ekkert því til fyrirstöðu að við klárum aðra umræðu svo við getum einhent okkur í það að taka málið aftur inn á milli annarrar og þriðju umræðu og bregðast við því sem fram hefur komið síðan þá. Þá getum við vonandi farið að klára þetta mál fljótlega svo við getum farið að snúa okkur að enn mikilvægari málum er varða umræðu um útlendinga,“ sagði Bryndís Haraldsdóttir.

Þingmenn stjórnarandstöðunnar ítrekuðu þá aftur að málið væri vanreifað og stjórnarliðar hafi sjálfir sagt að ræða þyrfti málin betur. Björn Leví sagði stjórnarliðum ekki treystandi til að taka málið eftir aðra umræðu og gera nægilega góðar breytingar á málinu til þess að það uppfylli mannréttindasjónarmið.

Að lokum var Bjarna Benediktssyni fjármálaráðherra nóg boðið og sagði þingmennina snúa öllu á hvolf í umræðunni. Málið hafi fengið verulegan tíma auk þess sem komið hafi verið til móts við sjónarmið minni hlutans, sem slái um sig með lýðræðishugtökum. 

„Þetta sama fólk telur sig þess umkomið að skipa fólki að koma í umræðuna hér á þingi eins og það eigi að lúta fyrirmælum Pírata eða annarra þingflokka um það hvort það tekur þátt í umræðunni. Mér er gjörsamlega misboðið hvernig þeir sem eru ekki í neinu öðru en margra daga málþófi í þinginu þykjast geta talað til annarra þingmanna um það hvernig þingstörfin eigi að fara fram,“ sagði Bjarni Benediktsson.

Önnur umræða stendur nú yfir og er viðbúið að málið verði rætt fram á nótt.