Dag­skráin í dag: Hamingjan er hér og Dončić mætir LeBron

Stöð 2 Sport

Klukkan 20.00 er þátturinn Hamingjan er hér á dagskrá. Í tveimur þáttum verður farið yfir sögu Þórs frá stofnun félagsins 1991 og þar til það varð Íslandsmeistari þrjátíu árum seinna.  Seinni þátturinn verður svo sýndur á nýársdag.

Um þátt kvöldsins: Árið 1991 er ákveðið að stofna körfuknattleiksdeild í Þorlákshöfn og hafa stofnendur háleit markmið og stóra drauma. Farið verður yfir sögu félagsins frá stofnun og fram til 2020 er Covid-19 faraldurinn stöðvar íslenskar íþróttir. Einnig er liðinu fylgt eftir til Kósóvó haustið 2022 þar sem Þór hefur þátttöku í Evrópukeppni félagsliða.

Stöð 2 Sport 2

Klukkan 19.30 hefst leikur Dallas Mavericks og Los Angeles Lakers í NBA deildinni. Bæði lið hafa átt erfitt uppdráttar á leiktíðinni og þurfa nauðsynlega á sigri að halda.