Ís­lenskar stjörnur gengu bláa dregilinn á for­sýningu Avatar

Leikstjórinn James Cameron sýnir aftur snilli sína með Avatar: The Way of Water sem er framhald af Avatar sem kom út fyrir þrettán árum síðan og er enn þann dag í dag tekjuhæsta kvikmynd allra tíma á heimsvísu. Nýja myndin gerist um áratug á eftir þeirri fyrri. Hún segir frá Sully fjölskyldunni sem þarf að gera allt sem hún getur til þess að vernda íbúa Pandora plánetunnar þegar ógn steðjar að þeim.

Það var öllu til tjaldað í Sambíóunum Egilshöll í gærkvöldi og þemað bersýnilega blátt en gestir gengu bláan dregil og blár bjarmi lýsti upp salinn. Íslenskar stjörnur létu sig ekki vanta á frumsýningu myndarinnar en meðal gesta voru Gísli Örn Garðarsson leikari, Gústi B fjölmiðlamaður, Sigga Lund útvarpskona, Gunnar Hansson leikari, Agla María knattspyrnukona, Tommi Steindórs og Ómar Úlfur útvarpsmenn, Ásgeir Kolbeins og Hera Gísla ásamt öðru frábæru fólki.