„Fyrir hvern ertu á lífi ef þú þorir ekki að prófa það sem þig langar til að gera?“

„Ég hef alltaf elskað athygli en ég þorði ekki neinu,“ segir Lil Curly sem var gestur í nýjasta þætti af hlaðvarpinu Jákastið.

Curly segist hafa látið feimnina stjórna sér þegar hann var yngri. Móðir hans ákvað loks að grípa til sinna ráða og senda hann á Dale Carnegie námskeið sem reyndist honum mikið gæfuspor.

Þegar hann var sautján ára gamall var hann orðinn virkur á samfélagsmiðlum og fann hann strax að það átti vel við hann að búa til efni á þeim. Hann reyndi fyrir sér á Instagram og YouTube og var staðráðinn í því að verða frægur. Seinna byrjaði Curly svo á samfélagsmiðlinum TikTok og fyrir þremur árum gerðist það svo að eitt af TikTok myndböndum hans sprakk út.

Sjá einnig: Byrjaði sem flösku­strákur á B5 en skemmtir nú fleiri milljónum manns út um allan heim

Endalaus vinna og efnið orðið þvingað

Í þættinum segir Curly frá því að fyrir um ári síðan hafi hann lent á vegg þegar hann fann að hann var ekki lengur að búa til TikTok efni fyrir sjálfan sig, heldur einungis fyrir samstarfsaðila sína.

„Ég vaknaði og hugsaði „ókei í þessari viku þarf ég að pósta fimm TikTokum fyrir sponsana mína“ og þetta var bara endalaus vinna. Í hverri einustu viku í eitt og hálft ár var ég að gera auglýsingar,“ segir Curly sem fannst efnið sitt orðið þvingað.

Fékk fimmtíu þúsund kall og nammi á meðan TikTok stjarna í L.A. fékk Porsche

Þá segist hann enn fremur hafa misst hvatann til að gera TikTok efni á Íslandi eftir að hann fór í heimsókn til L.A. og kynntist TikTok heiminum þar. Þar sé fólk mun móttækilegra fyrir efninu og þar séu umtalsvert meiri peningar í boði.

Curly er þekktur fyrir myndbönd þar sem hann keyrir um með opna rúðu og syngur lagstúf út um gluggann í von um að gangandi vegfarendur botni lagið. 

„Hérna heima fékk ég einhverja sponsa á þetta. Þá var ég að kasta nammi út úr bílnum. Á meðan einn strákur úti sem tekur upp svipað efni og ég, hann fékk Porsche. „Hér er bíll fyrir þig, taktu upp myndböndin þín á Porche“, á meðan ég fæ kannski fimmtíu þúsund kall fyrir hvert myndband sem ég kasta nammi út úr bílnum. Þetta er svo allt öðruvísi bransi. Það var þá sem ég sá að ég er ekki að fara gera þetta fyrr en ég fer til L.A., þá kannski fer ég að halda áfram með þetta.“

Merkti ekki auglýsingu og missti samstarfsaðilana

Fyrir um mánuði síðan lenti hann svo í öðru bakslagi þegar Neytendastofa sakaði hann um duldar auglýsingar.

„Ég merkti ekki #ad á eitthvað TikTok. Þá duttu allir sponsarnir út og ég er ekki búinn að pósta neinu þannig séð síðan þá. Núna er ég að vanda mig. Fyrir mitt leyti þá bara nenni ég ekki að merkja #ad eins og fyrir Coca Cola þegar ég er búinn að vera vinna með þeim í tvö ár,“ segir Curly sem skilur ekki hvers vegna tónlistarmenn mega fara upp á svið í peysu merktri samstarfsaðila án þess að tilgreina að um samstarf sé að ræða, en samfélagsmiðlastjörnur þurfi að gera það.

Tilbúinn að stökka á tækifærin

Í kjölfar Neytendastofumálsins hætti Curly samstarfi sínu við stærstu fyrirtækin og hefur hann haldið sig til hlés á samfélagsmiðlum. Nú stendur hann á tímamótum og íhugar sín næstu skref. Hann er óhræddur við að prófa nýja hluti og er tilbúinn að stökkva á tækifærin þegar þau bjóðast.

„Ég tengi svo lítið við fólk sem vill ekki byrja á hinu eða þessu af því það þorir ekki útaf einhverri gagnrýni. Ég á frænda sem býður mér að læka Facebook síðuna sína annan hvern dag af því hann er alltaf að búa til ný fyrirtæki. Sama hvað, þá á maður alltaf að prófa, því fyrir hvern ertu annars á lífi, ef þú þorir ekki að prófa að gera það sem þú vilt gera.“

Hér að neðan má hlusta á viðtalið við Lil Curly í heild sinni. Í þættinum ræðir hann meðal annars upphafið að TikTok ferlinum, Idol ævintýrið, DJ ferilinn og hvernig hann tæklar neikvæðni.