Ísland á sex stórmót í handbolta á næsta ári

Rússland missti þátttökurétt sinn á EM U19 og EM U17 kvenna næsta sumar og fær Ísland þau sæti vegna góðs árangurs síðastliðið sumar, þegar Ísland varð í 8. sæti á heimsmeistaramóti U18 landsliða og U17 landsliðið endaði í 13. sæti á Opna Evrópumótinu.

„Þátttaka í stórmótum er ómetanleg reynsla fyrir landsliðsfólkið okkar og frábær undirbúningur fyrir A landslið, þetta er því stór áfangi í því að búa enn betur að okkar framtíðarlandsliðsmönnum með von um frekari afrek þegar kemur að A landsliðum í framtíðinni,“ segir í tilkynningu frá HSÍ þar sem greint er frá tíðindunum góðu hvað stúlknalandsliðin varðar.

Áður var ljóst að A-landslið karla yrði með á HM í janúar, og að þrjú yngri landslið karla yrðu einnig með á stórmótum á næsta ári.

Íslensk handboltalandslið á stórmótum 2023:

• A landslið karla - HM í Svíþjóð og Póllandi
• U-21 karla - HM í Þýskalandi og Grikklandi
• U-19 karla - HM í Króatíu
• U-17 karla - Opna Evrópumótið í Svíþjóð
• U-19 kvenna - EM í Rúmeníu
• U-17 kvenna - EM í N-Makedóníu