Fær milljónir þar sem enginn gekk úr skugga um meint asbest í húsinu

Tvennt lést í brunanum við Kirkjuveg á Selfossi árið 2018. Var Vigfús Ólason dæmdur í fjórtán ára fangelsi fyrir að hafa kveikt í húsinu með fyrrgreindum afleiðingum.

Í fréttum um niðurif hússins árið 2018 kom fram að það yrði umfangsmikið verk þar sem talið var að asbest væri í húsinu. Vaskur vinnuhópur um tuttugu manna sá um niðurrifið. Í frétt Vísis frá því í nóvember 2018 má sjá vel búna starfsmenn sinna verkinu, en fylgja þarf ströngum kröfum þegar farga á asbesti. Til að mynda sprautaði slökkviliðið vatni á húsið á meðan niðurrifinu stóð.

Ljóst er að þessi aðgerð var kostnaðarsöm. Tekist var á um kostnaðinn í Héraðsdómi Reykjavíkur, sem kvað upp dóm í málinu undir lok síðasta mánaðar.

Eigandi hússins, sem bjó ekki í því þegar kviknaði í því, krafði VÍS um 14 milljóna króna greiðslu á þeim grundvelli að ósannað að asbest hafi verið í húsinu og að frádáttur tryggingafélagsins á þeim grundvelli að undirstöður og fráveitukerfi hússins hafi ekki skemmst ættu ekki rétt á sér.

Vildi eigandinn meina að asbestið hafi verið fjarlægt á árum áður við endurbætur á húsinu, því hafi verið óþarfi að ráðast í hið kostnaðarsama og vandasama verk sem niðurrifið var. Kostnaður við það var 9,7 milljónir króna, sem tryggingafélagið dró frá greiðslu brunabóta.

Taldi eigandinn að stór hluti kostnaðarins við förgunina hafi verið vegna hins meinta asbests. Ekkert hafi hins vegar verið gert til að sannreyna að asbest hafi raunverulega verið í húsinu. Því hafi einfaldlega verið slegið föstu.

Í dómi héraðsdóms segir að ekkert liggi fyrir um að tryggingafélagið hafi rætt við eigandinn eða leitað upplýsinga hjá honum um húsið, eða upplýst hann um fyrirhugað niðurrif.

Þar kemur einnig fram að heilbrigðiseftirlit svæðisins sem og verkfræðistofa sem vann að verkinu hafi dregið þá ályktun að asbest mætti finna í húsinu, án þess að neinn hafi gengið úr skugga um það.

Telur dómurinn því að vafi hafi leikið á því að asbest hafi verið í húsinu. Var tryggingafélagið því dæmt til að greiða manninum 6,1 milljón króna vegna niðurrifsins. Um var að ræða þá fjárhæð sem tryggingafélagið hafði dregið frá vegna kostnaðar við niðurrifsins mínus 3,6 milljónur vegna þeirrar fjárhæðar sem dómurinn taldi eðlilegt að miða ætti við útreikning kostnaðar á niðurrifi.

Þá þarf tryggingafélagið einnig að greiða eigandanum þrjár milljónir þar sem tryggingafélaginu hafi ekki tekist að sýna fram á að undirstöður hússins og fráveitukerfi þess væru nothæfar.

Alls þarf VÍS því að greiða eigandanum 9,1 milljón króna, auk 1,7 milljóna sem renna til ríkissjóðs vegna málskostnaðar.