Titrandi hringur og þyngdir fiskar nýjustu hneykslin eftir skáksvindlið

Nýliðinn Robbi Jade Lew var sökuð um að svindl eftir að hún hafði betur gegn Garrett Adelstein, vinsælum spilara, í pókerleik síðastliðinn fimmtudag en Lew vann 269 þúsund dollara pott, sem samsvarar rúmlega 39 milljónum króna.

Leiknum var streymt af Hustler Casino Live frá Kaliforníu en áhorfendur urðu varir við að útkoman hafi komið Adelstein sérstaklega á óvart, þar sem Lew var með talsvert verri spil til að byrja með og hefði að öllu jöfnu átt að gefast upp fyrr. Þeir sem voru að lýsa leiknum lýstu einnig furðu yfir ákvörðunum Lew að halda áfram á nokkrum tímapunktum.

Í yfirlýsingu á Twitter eftir leikinn sagði Adelstein augljóst að Lew hafi svindlað. Margir hafa velt því upp að Lew hafi notað titrandi hring til að láta hana vita að hún væri með bestu spilin í umferðinni, þó það hafi ekki verið sannað samkvæmt frétt Insider.

Í tilkynningu sagði Hustler Casino Live að engin sönnunargögn væru til staðar sem sönnuðu svindl, þrátt fyrir ásakanir. Það kæmi þó til greina að nota lygamæli og að lögfræðingar yrðu fengnir í málið. Hvorki Lew né Adelstein væru velkomin aftur til keppni fyrr en niðurstaða lægi fyrir. Þau töluðu þó saman eftir leikinn og samþykkti Lew að gefa Adelstein peningana sem hann hafði tapað.

Hiti í mönnum eftir að fiskar voru skornir upp

Daginn eftir bárust fregnir af annars konar og alls kostar ótengdu svindli í Bandaríkjunum. Chase Cominsky og Jake Runyon, veiðimenn í Ohio-ríki, unnu þrjátíu þúsund dollara, rúmlega 4,3 milljónir króna, í lokaumferð Lake Erie Walleye Trail keppninnar. 

Það vakti þó upp grunsemdir mótshaldara þegar fimm fiskar, sem þeir áætluðu að væru um tuttugu pund, vógu tæplega 34 pund. 

Við vigtun var ákveðið að skera upp fiskana og kom þá í ljós að blýkúlum og jafnvel flökum af öðrum fiskum hafi verið komið fyrir í fiskunum. Tilgangurinn sé að láta þá líta út fyrir að vera þyngri en raun bar vitni. Myndbönd af atvikinu hafa farið í deilingu á netinu og má þar sjá að mikill hiti var í mönnum.

Að því er kemur fram í frétt BBC eru fyrri sigrar parsins til skoðunar. Fréttamiðlar á svæðinu sögðu þá hafa verið dæmda úr leik í keppninni í fyrra eftir að einn þeirra féll á lygamælaprófi. Hvorki Cominsky né Runyon hafa svarað fyrir ásakanirnar.

Hjálpartæki ástarlífsins í meintu skáksvindli

Fregnirnar af meintu svindli pókerspilara og veiðimanna koma innan við mánuði eftir að meint svindl skók skákheiminn. Heimsmeistarinn Magnus Carlsen hætti í miðri keppni á Sinquefield-mótinu í síðasta mánuði en hann taldi brögð hafa verið í tafli eftir að hann tapaði fyrir hinum nítján ára Hans Niemann. 

Carlsen deildi myndskeiði á Twitter, þar sem knattspyrnuþjálfarinn Jose Mourinho sagðist ekki geta tjáð sig, þar sem það myndi aðeins koma honum í vandræði. Margir túlkuðu tíst Carlsen á þann veg að þarna væri hann að saka Niemann um svindl.

Getgátur voru á lofti að Niemann hafi verið með fjarstýrt unaðstæki ástarlífsins í endaþarminum og vitorðsmaður hans gefið honum upplýsingar um besta leikinn með því að láta tækið titra.

Um var að ræða alþjóðlegt skákmót þar sem heildarverðlaunafé nam í kringum fimm hundruð þúsund dollurum, hátt í 73 milljónum króna. Niemann hafði áður gerst uppvís að svindli á skáksíðunni Chess.com en hann neitaði alfarið að hafa svindlað í keppninni við Carlsen.

DV greinir þá frá því í dag að stórmeistarinn Fabiano Caruana telji Niemann hafi einnig svindlað gegn hinum íslenska Hjörvari Steini Grétarssyni þegar þeir mættust á Reykjavíkurskákmótinu í apríl. 

„Þessi skák er annað hvort tefld af snillingi eða það er eitthvað undarlegt á seyði. Það er annað hvort,“ sagði Caruana í hlaðvarpsþættinum C-squared samkvæmt frétt DV.