Trump-liðar kvarta undan „vopnvæðingu“ dómsmálaráðuneytisins

Forsetinn tók mikið magn opinberra gagna með sér til Flórída þegar hann yfirgaf Hvíta húsið og þar á meðal voru leynileg gögn. Sum gagnanna voru merkt sem „Top Secret“ sem er ein hæsta leyndarskilgreining bandarískra stjórnvalda.

Sjá einnig: Tók leynileg gögn með sér til Flórída

Með réttu hefðu Trump-liðar átt að senda þessi gögn til Þjóðskjalasafns Bandaríkjanna.

AP fréttaveitan segir rannsókn hafa staðið yfir í nokkra mánuði og að málið snúi að á annan tug kassa sem innihéldu opinber gögn. Trump stendur þar að auki frammi fyrir annarri rannsókn vegna tilrauna hans til að snúa niðurstöðum forsetakosninganna 2020 og viðleitni hans til að halda völdum og vera áfram forseti.

Bandarískir sagnfræðingar segja engin fordæmi fyrir húsleit sem þessari. Alríkislögregla Bandaríkjanna hafi aldrei áður gert atlögu sem þessa, jafnvel ekki í tengslum við Watergate-málið í forsetatíð Richards Nixon. Honum var meinað að taka nokkur gögn úr Hvíta húsinu eftir að hann sagði af sér vegna málsins.

Strangar reglur fylgja því að fá heimild fyrir húsleit sem þessari og þurftu rannsakendur að leita til alríkisdómara og sannfæra hann um að glæpur hafi líklega verið framinn og að vísbendingar um þann glæp sé hægt að finna með húsleitinni. Hæst settu embættismenn Dómsmálaráðuneytisins hefðu þurft að samþykkja þessa húsleit, samkvæmt frétt Wall Street Journal.

Sagði sjálfur frá leitinni

Trump sjálfur sagði fyrst frá húsleitinni í gærkvöldi og hélt hann því fram að umsátursástand ríkið við Mar-A-Lago og sakaði Demókrata um að vopnvæða réttarkerfið gegn sér. Starfsmenn Trumps sendu strax í gær út fjöldapósta til stuðningsmanna hans um að hann þyrfti fjárhagslega aðstoð til að berjast gegn þessum ofsóknum

Sjá einnig: Alríkislögreglan gerði húsleit heima hjá Trump

Bandamenn Trumps á þingi og innan Repúblikanaflokksins hafa brugðist reiðir við leit FBI og sömuleiðis gefið í skyn að aðgerðir lögreglunnar angi af pólitík, samkvæmt frétt Washington post. 

Repúblikanar muni rannsaka málið

Kevin McCarthy, leiðtogi Repúblikana í fulltrúadeild Bandaríkjaþings, sagði til að mynda að aðgerðirnar yrðu rannsakaðar af þinginu, nái Repúblikanar þar meirihluta í þingkosningunum í haust

Í stóryrtri yfirlýsingu sem hann birti á Twitter sagði hann Dómsmálaráðuneyti Bandaríkjanna hafa verið vopnvætt af pólitíkusum. Merrick Garland, dómsmálaráðherra, ætti að varðveita öll sín gögn og hreinsa dagatalið sitt fyrir rannsóknina.

Aðrir Repúblikanar hafa slegið á svipaða strengi. Þeirra á meðal Ron DeSantis, ríkisstjóri Flórída, og Ronna McDaniel, formaður Landsnefndar Repúblikanaflokksins. Þau hafa bæði sagt húsleitina til marks um aukna „vopnavæðingu“ opinberra stofnanna.

Joe Biden, núverandi forseti, sagðist í gær ekki hafa vitað af húsleitinni fyrirfram og Christopher Wray, yfirmaður FBI, var skipaður í embætti af Trump fyrir fimm árum. Það gerði Trump eftir að hann rak James Comey, forvera Wray, vegna Rússarannsóknarinnar svokölluðu.

Þá hafa margir stuðningsmenn Trumps lýst því yfir á samfélagsmiðlum að borgarastyrjöld sé nú hafin í Bandaríkjunum.

Segja markmiðið að koma í veg fyrir nýtt framboð

Trump og bandamenn hans hafa þar að auki haldið því fram að markmið með þessum aðgerðum gegn forsetanum fyrrverandi sé að koma í veg fyrir að hann bjóði sig aftur fram í kosningunum 2024, eins og hann hefur ítrekað gefið í skyn að hann ætli sér að gera.

Lög um varðveitingu opinberra og leynilegra gagna segja meðal annars til um að fólk sem brjóti þau megi ekki gegna opinberum embættum í Bandaríkjunum. Lögin þykja þó loðin og sérfræðingar hafa áður sagt að ólíklegt að þau haldi vatni. Það sé tíundað í stjórnarskrá Bandaríkjanna hverjir séu kjörgengir í Bandaríkjunum og þingið geti ekki gert lög til að breyta því, án þess að gera breytingar á stjórnarskránni.

Það kom meðal annars í ljóst þegar Repúblikanar veltu vöngum yfir því hvort Hillary Clinton gæti ekki boðið sig fram til forseta gegn Trump árið 2016, vegna þess að hún hafði notað persónulegan vefþjón fyrir opinbera tölvupósta er hún starfaði sem utanríkisráðherra í ríkisstjórn Baracks Obama. Vert er þó að taka fram að hún var aldrei ákærð fyrir glæp.

Trump krafðist þess þó ítrekað að Hillary Clinton yrði fangelsuð fyrir vefþjóninn og gerði hann það að herópi sínu fyrir kosningarnar.

Samkvæmt frétt New York Times er hægt að dæma fólk í allt að þriggja ára fanglesi fyrir að brjóta umrædd lög.