Kristó: Pavel var bara í Angry Birds

Valur tapaði leik fjögur á Sauðárkróki þar sem Pétur Rúnar Birgisson, leikmaður Tindastóls, skorar lokakörfuna í framlengdum leik þegar hann nær að komast inn í sendingu frá Pavel Ermolinskij, leikmanni Vals, sem ætluð var samherja hans, Kristófer. Sá síðarnefndi var bálreiður í leikslok.

„Klefinn var þungur eftir leik, ég man að ég sá rautt því ég var svo pirraður. Svo lít ég upp og sé að Pavel var í Angry Birds í símanum sínum út í horni. Þá bara hristi maður hausinn og hló inn í sér því Pavel var þarna bara að dreifa huganum, mættur í Angry Birds. Hann er náttúrlega alveg geggjaður,“ sagði Kristófer í hlaðvarpsþættinum Undir Körfunni en þátturinn verður aðgengilegur á allra næstu dögum.

„Við vissum að við fengum auka séns, að fara heim og spila fyrir framan okkar fólk.“

Leikmenn Vals voru staðráðnir að láta þetta tap ekki sitja í sér en þeir unnu síðan oddaleikinn á heimavelli og hömpuðu Íslandsmeistaratitlinum.

„Þetta sveið mikið en svona virkar körfuboltinn. Maður þarf að vinna þrjá leiki þannig við pössuðum okkur að fara ekki of langt niður,“ sagði Kristófer Acox.