Á níunda hundrað við­burða í Hörpu í fyrra

Rekstrarárið hjá Hörpu í fyrra markaðist af heimsfaraldri og síbreytilegum samkomutakmörkunum, sem skýrir tekjutap hennar sem nam rúmum 160 milljónum króna. Þetta segir í tilkynningu frá Hörpu, sem gaf út samstæðureikning sinn fyrir rekstrarárið 2021 í dag. 

Heildartekjur Hörpu á árinu voru 782,5 milljónir króna samanborið við 513,6 milljónir króna árið á undan. Það er þó talsvert minna en árið 2019, áður en heimsfaraldur hófst, en þá voru árstekjurnar 1.209,6 milljónir króna. Rekstrarhagnaður samstæðunnar fyrir afskriftir og fjármagnsliði var 121,7 milljón króna í fyrra, samanborið við 113,2 milljónir árið 2020. 

Eigið fé samsæðunnar nam 10.953 milljónum króna í árslok 2021 og er eiginfjárhlutfallið 33 prósent. 

„Þrátt fyrir að háhrif heimsfaraldursins hafi dregist á langinn og litað alla starfsemi ársins voru haldnir 867 viðburðir í Hörpu samanborið við rúmlega 500 á árinu 2020. Það eru að jafnaði um 17 á viku og rúmlega 60% af viðburðarhaldi venjulegs árs,“ segir í tilkynningu frá Hörpu. 

Þar kemur fram að haldnir voru 465 listviðburðir: Tónleikar, leiksýningar og listsýningar. Sinfóníuhljómsveit Íslands hélt þar af 75 tónleika. Listviðburðir Íslensku óperunnar voru alls níu talsins. Í Hörpu voru þá haldnar 324 ráðstefnur, fundir og veislur samanborið við 141 slíkan viðburð árið á undan. 

Um 124 þúsund aðgöngumiðar seldurst á síðasta ári samanborið við 65 þúsund árið 2020 en seldur miðafjöldi árið 2019 var 232 þúsund. Heildarvelta miðsaölu á árinu nam um 685 milljónum króna samanborið við 301 milljón króna árið 2020 og 1.294 milljónir króna árið 2019.

Meira en helmingur húsnæðiskostnaðar fór í fasteignagjöld

Þá var húsnæðiskostnaður 595 milljónir króna en hlutur fasteignagjalda í þeim kostnaðarlið er 309,7 milljónir, eða ríflega helmingur. 

„Allt frá árinu 2013 hafa eigendur Hörpu, íslenska ríkið (54%) og Reykjavíkurborg (46%), lagt til rekstrarframlag til að tryggja rekstrarhæfi samstæðunnar. Framlagið er fyrst og fremst til að mæta háum fasteignagjöldum, kostnaði vegna viðhalds byggingar sem jafnframt er listaverk og til að sinna mikilvægu menningarhlutverki Hörpu,“ segir í tilkynningunni.

Þá segir jafnframt að rekstrarframlag eigenda á árinu nam 450 milljónum króna auk tekjufærðs mismunar vegna fjármögnunarsamnings, að fjárhæð 25,3 milljónum króna. Í ár líkt og 2020 hafi eigendur lagt til sérstakt viðbótarframlag, síðastliðið ár að upphæð 284,5 milljónum króna, til að mæta lamandi áhrifum heimsfaraldurs á kjarnastarfsemi Hörpu á sviði viðburðarhalds og ferðaþjónustu.