Hús­leit gerð á heimili og vinnustað Karls Wernerssonar

„Ég hef hingað til ákveðið að halda mig til hlés í fjölmiðlum hvað varðar ofsóknir yfirvalda á hendur mér vegna meintra bókhaldsbrota árin fyrir hrun. Mál vegna þessa hafa nú tekið 14 ár á þessu ári með viðeigandi óvissu fyrir alla aðila. Á þeim tíma hafa fallið dómar og áfrýjanir hafa orðið að frekari dómum. Ég hef setið í fangelsi, verið á áfangaheimili og verið í stofufangelsi.“

Þá vísar hann til máls sem hann vann fyrir Mannréttindadómstól Evrópu þar sem brot íslenska ríkisins var viðurkennt í máli þar sem Karl var dæmdur til fangelsisvistar.

„Í kjölfar þessarar niðurstöðu hjá Mannréttindadómstól Evrópu og Endurupptökudómi og í kjölfar þess að sakamálið er aftur komið til meðferðar hjá Hæstarétti, virðist yfirvöldum þykja viðeigandi að hefja ofsóknirnar upp á nýtt með húsleit á heimili mínu, vinnustað mínum og heimili fjölskyldumeðlima ásamt fleiri aðilum,“ segir Karl í yfirlýsingu sinni.

Sátt náðist í málinu og viðurkenndi íslenska ríkið að Karl og fjórir aðrir hafi ekki fengið réttláta málsmeðferð varðandi dóma sem þeir fengu í kjölfar hrunsins. Ríkið greiðir bætur í málinu og hefur Mannréttindadómstóll Evrópu því fellt málin niður. Greiðir íslenska ríkið Sigurjóni Þorvaldi Árnasyni, Ívari Guðjónssyni, Sigurþóri Charles Guðmundssyni, Margréti Guðjónsdóttur og Karli Wernerssyni 1,8 milljónir króna í bætur.

Telur tímasetninguna enga tilviljun

Telur Karl að tilgangurinn með húsleitunum sé að aðstoða þrotabú sitt vegna dómsmála sem það reki nú í dómskerfinu.

„Ekki er talið nóg að þrotabúið reyni að sækja fjármuni heldur ákveður yfirvaldið að rétt sé, þegar von er á dómi á næstu dögum, að hefja sakamálarannsókn.“

Hann dregur í efa að það sé tilviljun að hafin sé sakamálarannsókn á grundvelli eldri kæru nokkrum dögum fyrir dómsniðurstöðu í tengdu einkamáli.  

„Er þörf á húsleit vegna viðskipta sem eru 8 ára gömul? Eða er kannski verið að reyna að hafa áhrif á dómara sem eru þessa dagana að kveða upp dóm? Eru mannréttindi bara sumra en ekki annarra? Hvenær sættir yfirvaldið sig við að tilefnið var ekkert og nú sé nóg komið af stöðugum inngripum inn í líf fólks? Eru 14 ár í ofsóknum ekki nóg?“

Hlaut dóm í Milestone-málinu

Karl hlaut dóm í Milestone-málinu svokallaða, ásamt Margréti Guðjónsdóttur og Sigurþóri Charles Guðmundssyni. Þau voru sýknuð í héraðsdómi en Hæstiréttur sakfelldi þau og dæmdi í fangelsi. Karl var einn aðaleigenda Milestone.

Í málinu var Karli gefið að sök að hafa misnotað aðstöðu sína og valdið félaginu verulegu fjárhagstjóni með því að láta það fjármagna efndir á samningum sem voru Milestone óviðkomandi en um var að ræða greiðslur til Ingunnar Wernersdóttur, systur Karls.

Kvörtun hinna sakfelldu til Mannréttindadómstóls Evrópu byggði meðal annars á þeim rökum að Hæstiréttur hafi ekki hlýtt á vitnisburð sakborninga og vitna, heldur endurmetið það sem fram kom við meðferð málsins fyrir héraðsdómi.

Þá gerði Karl athugasemd við hlutabréfaeign fjögurra dómara við réttinn, þeirra Gretu Baldursdóttur, Markúsar Sigurbjörnssonar, Ólafs Barkar Þorvaldssonar og Viðars Más Matthíassonar.

Karl vildi ekki ræða við fréttastofu þegar eftir því var leitað.