Getur orðið svakalega þungt fyrir Hildi

Í næstu sætum á eftir Hildi á nýjum lista flokksins eru Ragnhildur Alda Vilhjálmsdóttir, Kjartan Magnússon, Marta Guðjónsdóttir og Björn Gíslason. Segja má að öll hallist þau heldur að því sem lýst hefur verið sem íhaldssamari armi borgarstjórnarhópsins, ólíkt Hildi. 

Jón telur að erfitt verði að samræma sjónarmiðin, eins og Tómas Þór Þórðarson fjölmiðlamaður setti myndrænt fram, og við nokkrar undirtektir, á Twitter eftir úrslitin. 

 Í þætti kvöldsins ræddu þeir Jón og Sigmar efasemdir sínar um væntanlegt gengi Sjálfstæðisflokksins en sammæltust um að Framsóknarflokkurinn sé líklegur til að koma á óvart í kosningabaráttunni. Viðtalið má sjá í spilaranum hér að ofan.

Ekki óhollt fyrir okkur að fá nýjan borgarstjóra

Fyrsta spurningin er þessi: Hver verður borgarstjóri í vor?

Jón: „Dagur Bergþóruson Eggertsson. Ég held að það sé ekki spurning, ég sé enga ástæðu til að skipta um hest í miðri á.“

Sigmar: „Ég held að það væri ekkert óhollt fyrir okkur að fá nýjan borgarstjóra, ég held að allir eigi sinn tíma.“ 

„Ekki vanmeta Framsókn“

Báðir hafa Jón og Sigmar töluverða trú á Framsóknarflokknum, eins og Jón lýsir því hýr í bragði: „Erum við ekki öll Framsóknarmenn?“

Sigmar telur að Einar Þorsteinsson fyrrverandi fréttamaður og núverandi oddviti Framsóknarflokksins geti staðið uppi með pálmann í höndunum eftir kosningar, vilji Sjálfstæðisflokkurinn mynda með honum meirihluta. 

Framsókn bjóði upp á skynsaman valkost. „Ég held að það sé einmitt heilbrigður kokteill þar af hinu frjálsa framlagi og samfélagslegri ábyrgð. Mér finnst sá flokkur alltaf hafa staðið vel undir þessari blöndu. Eins og eðli flokksins er, hann getur unnið með öllum. Ég held að Einar verði í kjörstöðu satt að segja,“ sagði Sigmar.

Jón Gnarr: „Ég myndi ekki vanmeta Framsókn. Þau eru að koma þarna fram með mjög athyglisverðan lista af fólki og athyglisverðar áherslur.“

„Ég skil ekki alveg Sjálfstæðisflokkinn í Reykjavík“

Fréttastofa ræddi við Hildi Björnsdóttur í kvöldfréttum í gær sem kvaðst engar áhyggjur hafa af því að hópurinn gæti ekki unnið saman þrátt fyrir ólík sjónarmið.

Sigmar Vihjálmsson segir Sjálfstæðisflokkinn hins vegar vera í tilvistarkreppu í borgarmálunum. „Mér finnst hann líka vera pínu tvískiptur í landspólitíkinni. Mér hefur bara fundist hann vera í tilvistarkreppu undanfarin ár,“ segir Sigmar.

Jón segir að þetta geti orðið svakalega þungt fyrir Hildi Björnsdóttur, að samræma sjónarmiðin innan flokksins. 

„Ég eins og mörg, ég skil ekki alveg Sjálfstæðisflokkinn í Reykjavík. Ég skil ekki hver er pælingin. En þetta er áskorun fyrir hana, vissulega. En mér finnst Hildur mjög flott og það sem ég hef séð til hennar,“ segir Jón.

Fyrrverandi borgarstjórinn telur að ólík sjónarmið innan Sjálfstæðisflokks geti hreinlega orðið flokknum til vandræða í komandi kosningum. 

„Ég myndi segja það í borginni. Mér finnst skorta einhverja stefnu og heildræna sýn og samvinnu. Mér finnst þetta vera svolítið út og suður,“ segir Jón Gnarr.