Juventus ekki í vand­ræðum með botn­liðið

Eftir afhroðið í Meistaradeild Evrópu nýverið þá vann Juventus góðan 2-0 sigur á Salernitana, botnliði Serie A – ítölsku úrvalsdeildarinnar í knattspyrnu, í dag.

Sóknartengiliðurinn Paulo Dybala kom Juventus yfir eftir aðeins fimm mínútna leik. Framherjinn magnaði Dušan Vlahović með sendinguna og Dybala skoraði með skoti í stöng og inn.

Vlahović sjálfur gerði svo í raun út um leikinn áður en hálftími var liðinn. Hann stýrði þá fyrirgjöf Mattia De Sciglio í netið. Staðan orðin 2-0 og reyndust það einfaldlega lokatölur leiksins.

Juventus er því með 59 stig í 4. sæti, sjö stigum minna en topplið AC Milan og aðeins fjórum stigum minna en Napoli sem er í öðru sæti deildarinnar þegar átta umferðir eru eftir af tímabilinu.