Í móttöku í Hvíta húsinu í gær spurði blaðakona Jo Biden forseta Bandaríkjanna þegar hann gekk framhjáí fullum sal af fólki hvort hann teldi Vladimir Putin Rússlandsforseta vera stríðsglæpamann og forsetinn svaraði:
„Ég tel að hann sé stríðsglæpamaður,“ sagði Biden og gekk á braut.
Ekki stóð á viðbrögðum Putins í rússnesku sjónvarpi sem er nánast eina uppspretta Rússa fyrir fréttir. Þar af leiðandi höfðu sennilega fæstir þeirra heyrt af þessum ummælum Bandaríkjaforseta.
„Við skiljum hvaða úrræði þetta heimsveldi lyganna hefur. En það er samt vanmáttugt gegn sannleikanum og réttlætinu. Rússland mun stöðugt miðla afstöðu sinni til alls heimsins," sagði Putin.
En Putin getur illa flúið hryllilegan sannleikann um árásir innrásarliðsins á óbreytta borgara, skóla, íbúðarhúsnæði og sjúkrahús. Þar sem börn og jafnvel barnshafandi konur og flóttamenn á öllum aldri hafa fallið í linnulausum sprengjuárásum.
Um hálfs mánaðar umsátur Rússa um Mariupol minnir óþægilega á langt umsátur nasista um Stalingrad í seinni heimsstyrjöldinni þar sem markmiðið var að svelta íbúana til dauða. Putin segir sum vestræn ríki hins vegar minna á nasista. Rússa séu ofsóttir í þessum ríkjum, börn þeirra hrakin úr skóla, þeir missi vinnuna, rússnesk tónlist, bókmenntir og menning séu bönnuð og þau vilji þurrka Rússland út.
„Vesturlönd hafa rifið af sér grímu velsæmis, byrjað að haga sér ruddalega, sýnt sitt rétta eðli.
Þetta er hrein samsvörun við ofsóknir nasista á gyðingum í Þýskalandi á 4. áratug síðustu aldar," sagði Putin sem hefur ætið verið tamt að halda því að Rússum að Vesturlöndum væri stjórnað af nasistum.
Þrátt fyrir áframhald loftárása Rússa á bæi og borgir í Úkraínu virðist framrás þeirra stöðnuð. Baráttuvilji Úkraínumanna er að sama skapi enn mikill.
Volodymyr Zelensky forseti Úkraínu segir Rússa eiga eftir að missa fleiri menn en í Sýrlandi og Tjesníu og Sovétmenn misstu í Afganistan.
„Ef stríð ykkar gegn úkraínsku þjóðinni heldur áfram munu rússneskar mæður missa fleiri börn
en þær misstu samanlagt í stríðunum í Afganistan og Tsjetsjeníu,“ sagði forseti Úkraínu í dag.
