Þetta segir Ben Hodges, Bandaríkjamaður og fyrrverandi herforingi, sem segist sannfærður um að mat hans á vandræðum Rússa eigi við rök að styðjast. Hodges segir að vandræði Rússa séu ekki eingöngu hernaðarlegs eðlis. Efnahagur landsins hafi beðið hnekki vegna refsiaðgerða.
Fylgjast má með nýjustu vendingum í Úkraínu í vakt Vísis.
Í grein sem hann birti í gær sagði Hodges að Vesturlönd yrðu að auka stuðning sinn við Úkraínumenn , því þeir þyrftu á vopnum og skotfærum að halda. Þeir þyrftu sérstaklega á vopnum að halda sem gætu verið notuð til að skjóta niður eldflaugar og granda fallbyssum sem Rússar væru að nota til að gera árásir á úkraínskar borgir.
Úkraínumenn þyrftu einnig að geta ráðist á rússnesk herskip í Svartahafi.
Russian generals are running out of time, ammunition, and manpower. That s not based on any inside intelligence it s clear from open source information and my own experience. I could be way off, but I am confident of this assessment. @general_ben https://t.co/8AXevUUsto
— CEPA (@cepa) March 15, 2022
Innrás Rússa er orðin mun umfangsmeiri en áætlanir gerðu fyrst ráð fyrir. Rússar bjuggust við því að það tæki þá einungis nokkra daga að brjóta Úkraínumenn á bak aftur.
Hodges segir að hernaður Rússa sé mun dýrari en gert hafi verið ráð fyrir og herinn eyði mun meira af skotfærum, eldsneyti og öðrum birgðum en búið var að undirbúa. Rússar hafi ekki burði til að halda þessari eyðslu áfram til lengdar.
„Eins og við vitum frá hernaðaraðgerðum Bandaríkjanna eru bestu vopnin mjög dýr og því takmarkað til af þeim. Rússar eru líklega að uppgötva það sama,“ segir Hodges. Hann segir Rússa þó eiga miklar birgðir af hefðbundnum stórskotaliðsprengjum og hefðbundnum loftsprengjum án stýringar.
Bróðurpartur rússneska hersins í Úkraínu
Varðandi mannafla segir Hodges að ráðamenn í Bandaríkjunum hafi sagt að um helmingur herafla Rússlands hafi verið bundinn innrásinni í Úkraínu. Þegar umfang stríðsreksturs Bandaríkjanna í Afganistan og Írak hafi verið hvað mestur, hafi um 29 prósent herafla Bandaríkjanna verið bundinn þeim hernaði.
Það segir Hodges að hafi reynst Bandaríkjunum erfitt að halda það út.
Með vísun til þess segir herforinginn að Rússar virðist ekki hafa næga hermenn til að umkringja Kænugarð og hvað þá að hertaka borgina.
Hodges segir að Úkraínumenn ættu að geta haldið Rússum fyrir utan borgarmörkin og þá sérstaklega fái þeir meira af vopnum frá Vesturlöndum. Sprengjuárásum Rússa muni þó líklega fjölga og fleiri almennir borgarar muni falla og særast og þurfa að flýja heimili sín.
Yes, Mr Secretary @SecDef . I agree. But we need more sense of urgency in that support to Ukraine...on the scale of the Berlin Airlift. They need the ability to destroy the Russian long-range fires/missiles that are killing Ukrainian civilians. We are in the decisive phase now. https://t.co/0ss5hOCtMr
— Ben Hodges (@general_ben) March 16, 2022
Erfitt að manna sveitirnar aftur
Þá er útlit fyrir mikið mannfall meðal rússneskra hermanna og Hodges segist telja um fimm til sex þúsund hermenn hafa fallið. Mun fleiri hafi særst.
Á meðal þessara hermanna séu vel þjálfaðar hermenn og mun það taka langan tíma fyrir Rússland að fylla upp í þær eyður sem fall þeirra myndar. Til viðbótar við það hafa borist margar fregnir af því að lítið þjálfaði hermenn Rússlands hafi lagt niður vopn og flúið auk þess að agi meðal þeirra er sagður mjög lítill.
Hodges segir að engar vísbendingar séu um að Rússar séu að fela vel mannaðar herdeildir einhversstaðar og ástandið gefi því til kynna að hinn meinti 900 þúsund manna her Rússlands sé í raun bara til á blaði.
Þann fyrsta apríl eiga þó um 130 þúsund rússneskar fjölskyldur að senda unga menn, 18 til 25 ára, til herþjálfunar í Rússlandi. Vladimír Pútín, forseti Rússlands, hefur sagt að þeir verði ekki sendir til Úkraínu og til viðbótar við það þyrfti að þjálfa þá áður, þannig að þeir munu líklegast hjálpa Rússum lítið í Úkraínu.
Hodges endar greiningu sína á því að næstu tíu dagar muni skipta sköpum fyrir Úkraínu. Það sé kapphlaup í gangi þar og Vesturlönd þurfi að átta sig á því og gefa allt í botn.
