„Þetta eru tvö mjög góð og jöfn lið“

Undanúrslitin í Coca Cola bikar karla í handbolta verða leikin í dag og í fyrri leiknum reyna FH-ingar að stöðva sigurgöngu Valsmanna í bikarnum.

Valsliðið er ríkjandi Íslands- og bikarmeistari í handbolta karla og á mögulega að vinna bikarinn tvisvar á sama tímabili því þetta tímabil byrjaði á bikarkeppninni sem átti að fara fram í fyrra.

Mótherjar Valsmanna í undanúrslitunum eru FH-ingar. FH liðið er vissulega að spila í dag í sínum heimabæ í Hafnarfirði en eru aftur á móti á heimavelli erkifjendanna í Haukum. FH hefur verið eitt besta liðið í Olís deild karla á þessari leiktíð og því er von á flottum leik.

Valsmenn unnu bikarinn í ellefta skiptið í haust og hafa farið í bikarúrslitin fjórum sinnum á síðustu sex árum. FH vann bikarinn síðast árið 2019 og þá eftir sigur á Val í úrslitaleik. FH er á eftir sínum sjöunda bikarmeistaratitli.

Fulltrúar liðanna tveggja mættu á kynningarfund fyrir leikina og þar tók Henry Birgir Gunnarsson viðtöl við menn.

„Við erum fullir tilhlökkunar og það kemur varla bikarhelgi þar sem við í FH spilum ekki á móti Val. Þetta er bara skemmtilegt,“ sagði Ísak Rafnsson, leikmaður FH.

„Bikarvikan er oft sérstök, það er meiri fiðringur og menn eru kannski aðeins meira einbeittir, vitandi það að það er mikið undir strax í fyrsta leik. Hann verður náttúrulega bara eini leikurinn ef þú tapar,“ sagði Vignir Stefánsson, leikmaður Vals.

„Við þurfum fyrst og fremst að spila okkar leik og gefa þeim ekki séns á að spila sinn leik. Þetta eru tvö mjög góð lið og jöfn lið. Ég geri því ráð fyrir hörku rimmu,“ sagði Ísak.

„Það eru yfirleitt bara átök þegar þessi lið mætast. Undanúrslit í bikar eiga bara að vera átök því annar væru menn ekki klárir eða með það í kollinum hvað væri undir,“ sagði Vignir.

Leikur Vals og FH fer fram á Ásvöllum og hefst klukkan 18.00 í kvöld.