Hjúkrunarfræðingurinn sem elskar að vera sauðfjárbóndi

Í þættinum Um land allt á Stöð 2 kynnumst við sveitabyggðinni að baki sjávarplássinu. Í dölunum inn af Bolungarvík var stundaður landbúnaður frá fornu fari og enn í dag finnst þar samfélag bænda. Í Skálavík, sem er einskonar bakgarður Bolvíkinga, var einnig fjöldi bújarða fram á miðja síðustu öld.

Á túnum við bæina Þjóðólfstungu og Minni-Hlíð sjáum við fjölda sauðfjár og þegar við kíkjum inn í fjárhúsin er mikið um að vera. Sauðfjárbændurnir Sigurgeir Jóhannsson og tengdadóttir hans, Svala Björk, eru ásamt fleirum að vigta féð. Sjálf segist Svala bara kalla sig hobbíbónda.

-En eruð þið að gera þetta fyrst og fremst til ánægju eða lifið þið á þessu?

„Nei, þetta er aukabúgrein. Það getur held ég enginn lifað á sauðkindinni.

Þetta er of skemmtilegt til þess að við getum hætt þessu. Það er vandamálið. Okkur finnst of vænt um þær,“ segir Svala.

Féð sækir í víkurnar og fjöllin í kring, fer alla leið yfir í Súgandafjörð. Svæðið er því stórt sem þarf að smala á haustin, meðal annars Keflavík, Skálavík og Stígahlíð.

-Þetta eru snarbrött fjöll hérna. Er ekki erfitt að smala þetta?

„Jú, jú, maður getur verið þreytt, sko.“

-Og eru þær að klifra hér upp í fjallstinda?

„Þær fara alveg upp í topp, sko.“

-En er þetta þess virði að standa í þessu?

„Þetta er rosagaman. Ég væri ekki í þessu nema af því að þetta er gaman,“ svarar Svala Björk.

Skálavík er einskonar bakgarður Bolvíkinga. Á eyðijörðinni Minnibakka hittum við Guðbjörgu Stefaníu Hafþórsdóttur, forseta bæjarstjórnar, og föður hennar, Hafþór Gunnarsson pípulagningameistara, sem fræða okkur um sögu Skálavíkur.

„Hér eru margir sem eiga orlofshús og nýta mikið á sumrin, bæði fólk sem býr í Bolungarvík og annarsstaðar á landinu,“ segir Guðbjörg.

„Hér var eiginlega lífhöfn Bolvíkinga og Ísfirðinga sem réru í Djúpið og dýpra,“ segir Hafþór.

Íbúðarhúsið á Minnibakka var reist árið 1906 en jörðin fór í eyði árið 1964, sú síðasta af sjö jörðum Skálavíkur.

„Það eru sjö býli hérna, svona aðalbýli. Svo var fullt af hjáleigum. Það var talað um 180 manns sem voru hérna þegar flest var,“ segir Hafþór.

Hann rifjar upp að um eitthundrað manns hafi verið í Skálavík árið 1910 þegar Magnús Magnússon, skáldið á Þröm, var þar kennari en hann var fyrirmynd Halldórs Laxness að Ólafi Kárasyni Ljósvíkingi í Heimsljósi.

Þátturinn er sá fyrri af tveimur um Bolungarvík en hann má nálgast í heild á Stöð 2+. Hér má sjá níu mínútna kafla:

Síðari þátturinn um Bolungarvík verður sýndur á mánudagskvöld klukkan 19:25. Mér má sjá kynningarstiklu þáttarins: