„Erfitt að sjá fólk sem í ofsa­reiði og af ó­skiljan­legum á­stæðum vill tor­tíma okkur“

Yfirvöld í Rússlandi hafa sagt markmið innrásarinnar í Úkraínu meðal annars að ganga milli bols og höfuðs á nasistum í Úkraínu sem þrífist þar í skjóli stjórnvalda. Sendiherra Rússlands hér á landi ítrekaði þá yfirlýsingu í vikunni.

„Ég vil leggja áherslu á að markmið þessara aðgerða, eins og Pútín forseti sagði, er afvopnun og afnasistavæðing Úkraínu sem eru nauðsynleg skilyrði til að tryggja öryggi Donbas-lýðveldanna,“ sagði Mikahil Noskov sendiherra Rússlands á Íslandi í kvöldfréttum Stöðvar 2 á fimmtudag.

Sendiherra Úkraínu á Íslandi gefur lítið fyrir þessar ásakanir Rússa.

„Þessi svokallaði sendiherra kallar okkur nasista. Hann ætti að líta í eigin barm. Vegna þess að rússnesk stjórnvöld smána rússnesku þjóðina. Vonandi mun rússneska þjóðin vakna og þurrka út þessa illsku af yfirborði jarðar. Annars mun skömmin og blóð Úkraínumanna vera á höndum rússnesku þjóðarinnar, ekki næstu áratugi heldur næstu aldirnar,“ segir Olga Dibrova, sendiherra Úkraínu á Íslandi og í Finnlandi. 

Vilja enn samtal við Rússa

Hún kallar eftir því að íslensk stjórnvöld slíti allt stjórnmálasamband við Rússland.

„Ég stóla á Ísland, að eftir þessa hræðilegu yfirlýsingu þessa svokallaða rússneska sendiherra, að honum verði tafarlaust vísað úr landi og að Ísland slíti stjórnmálasambandi við Rússland. Í samskiptum við þetta fólk þýðir ekkert að tala um diplómatískar lausnir.

„Við erum lýðræðislegt ríki, skuldbundin friði. Við höfum ekki skotið á neinn. Allar lygarnar um að við höfum beint spjótum okkar að fólkinu í Donbas eru ósannar. Meira en 1,5 milljón manna eru á flótta í Úkraínu frá Donbas og Krímskaga,“ segir Dibrova. 

„Ríkisstjórn okkar er lýðræðislega kjörin, forseti okkar er lýðræðislega kjörinn og þingið líka. Við höfum írekað reynt á friðarviðræður við Rússa svo við getum haldið pólitísku samtali áfram en þeir hafa ítrekað neitað,“ segir hún. 

„Þrátt fyrir ítrekaðar tilraunir hafa þeir nú ráðist á okkur og úkraínsku þjóðina og varpað sprengjum. Frá því að stríð okkar við Rússa hófst árið 2014 höfum við misst fimmtán þúsund manns. Þrátt fyrir þetta köllum við nú eftir því að Rússar setjist að samningaborðinu og stöðva stríðið.“

Hægt er að horfa á viðtalið við Olgu í heild sinni í spilaranum hér að neðan. 

„Þeir eru lygarar!“

Rússnesk yfirvöld hafa þá sakað Úkraínuher um að skjóta á úkraínsk íbúasvæði til að geta kennt Rússum um.

„Þeir eru lygarar! Þeir eru lygarar! Við erum að gera allt sem við getum til að bjarga fólkinu okkar. Þeir eru að kenna öðrum um hluti sem þeir eru sekir um sjálfir,“ segir Dibrova. 

„Í þeim heimi sem við lifum í dag er ekkert hægt að fela. Allur heimurinn stendur með okkur og það sýnir allt alþjóðasamfélagið. En við ættum í sameiningu að ganga lengra. Einangra Rússland og sýna rússnesku þjóðinni að hún sér ekkert nema falsfréttir.“

Innrásin minni á innrás nasista 1941

Árásir Rússa beinist ekki eingöngu að hernaðarinnviðum.

„Innrásarliðið ræðst á leikskóla og munaðarleysingjahæli. Það skýtur flugskeytum á borgir og íbúahverfi. Blóðugir bardagar eru háðir um alla Úkraínu og nú þegar hefur innrásarliðið náð að höfuðborginni okkar Kænugarði og barist er allt í kringum og inni í borginni,“ segir Dibrova. 

„Almenningur felur sig í kjöllurum og neðanjarðarlestarstöðvum. Árásarliðið hefur náð að sölsa undir sig kjarnorkuverið í Tsjernóbíl og vegna mikils umgangs hefur kjarnorkumengun aukist undanfarna daga,“ segir hún. 

„Til að vera alveg hreinskilin er þetta ástand sem hvorki við né önnur Evrópuríki hafa séð síðan 1941 þegar Þýskaland nasismans og Hitler réðust á okkur. Þessi innrás var keimlík henni, gerðist mjög snemma morguns. Hermenn okkar eru ekki þeir einu sem hafa fallið heldur hafa almennir borgarar og börn fallið í átökunum nú þegar.“

Þingmenn hafi allir tekið upp vopn

Hún segir úkraínska herinn berjast hetjulega og af hörku og segir alla Úkraínumenn biðja fyrir herliðinu, sem verji landið. 

„Og það er ekki bara herinn sem berst heldur hafa allir, sem eru færir, tekið upp vopn. Við þurfum ekki aðeins að berjast við hermenn heldur líka verjast netárásum vegna þess að Rússar herja á okkur með falsfréttum,“ segir Dibrova. 

Hún bendir þá á það að ríkisstjórn, þingmenn og aðrir stjórnmálamenn hyggist vera áfram í Kænugarði og margir þeirra hafi þegar gengið til liðs við herinn. 

„Forseti okkar, forsætisráðherra, forseti þingsins og allir þingmennirnir eru í Kænugarði og við erum sameinuð sem aldrei fyrr. Allir þingmennirnir bera vopn í höndum og eru tilbúnir til að verja lýðræðisstofnanir okkar. Með þenna baráttuanda munum við sigra en því miður mun fólk falla,“ segir Dibrova.

Grét þegar fjölskyldan sendi henni mynd af rússneskum skriðdreka við heimilið

Dibrova er sjálf stödd í Finnlandi, þar sem sendiráð hennar er staðsett. Hún segir að þrátt fyrir það líði henni ekki eins og hún sé í friðsælu landi. 

„Allir Úkraínumenn, diplómatar eða ekki og hvar sem þeir eru, eru í stríði. Við verðum líka að berjast á diplómatískan hátt og gerum allt til að sjá landinu okkar fyrir því sem er nauðsynlegt. Hvort sem það eru vopn eða sjúkravörur eða fjárhagsaðstoð. Við höfum ekki sofið og erum með tárin í augunum. Við erum áhyggjufull um fjölskyldur okkar í Úkraínu,“ segir Dibrova.

„Ég grét í gærmorgun þegar ég fékk myndband frá fjölskyldunni minni af rússneskum skriðdreka keyra um götuna mína í Kænugarði. Það er bara í tuttugu mínútna fjarlægð frá þinghúsinu. Það er mjög erfitt að sjá fólk sem í ofsareiði og af óskiljanlegum ástæðum vill tortíma okkur. Vill tortíma ríki okkar og taka af okkur föðurlandið, sem við elskum af öllu okkar hjarta,“ segir Dibrova. 

„Eftir allt saman verðum við að berjast fyrir hinu góða og það er það sem við erum að gera.“