KR hefur unnið síðustu fjóra deildarleiki liðanna þar af átta stiga sigur í fyrri leik liðanna á þessu tímabili.
KR vann þá 98-90 sigur þar sem Shawn Glover var með 33 stig og 15 fráköst og Þórir Þorbjarnarson bætti við 28 stigum, 15 fráköstum og 8 stoðsendingum. Vandamálið fyrir KR-inga er að Glover og Þórir eru ekki lengur með liðinu.
Síðasti deildarsigur Stjörnunnar á KR var í Garðabænum 29. nóvember 2019. Síðan eru liðnir 26 mánuðir og 19 dagar.
Stjörnumenn unnu leikinn reyndar með 43 stigum, 110-67, en hafa ekki unnið Vesturbæinga í deildinni síðan.
Stjarnan vann bikarleik á móti KR í haust en það var ekki nóg til að losna undan takinu þegar liðin mættust í deildinni í nóvember síðastliðnum.
Arnar Guðjónsson, þjálfari Stjörnumanna, var greinilega orðinn mjög pirraður á slöku gengi á móti KR því hann var rekinn út úr húsi í síðasta leik liðanna og endaði á því að vera dæmdur í eins leiks bann.
- Síðustu deildarleikir Stjörnunnar og KR:
- 12. nóvember 2021: KR vann átta stiga sigur í Vesturbænum (98-90)
- 6. maí 2021: KR vann 11 stiga sigur í Garðabænum (96-85)
- 11. febrúar 2021: KR vann níu stiga sigur í Vesturbænum (100-91)
- 6. mars 2020: KR vann tveggja stiga sigur í Vesturbænum (79-77)
- 29. nóvember 2019: Stjarnan vann 43 stiga sigur í Garðabænum (110-67)
Leikur Stjörnunnar og KR verður sýndur beint á Stöð 2 Sport og hefst útsendingin klukkan 20.05. Á undan verður sýndur leikur ÍR og Vals og eftir munu Subway-Tilþrifin gera upp alla leiki kvöldsins.
Subway-deildirnar í körfubolta eru á Stöð 2 Sport en upplýsingar um útsendingar má finna hér. Subway-deildin er hluti af Stöð 2 Sport Ísland sem kostar 3.990 krónur á mánuði.
