Öryggi vegfarenda á stígum eigi að vera í forgangi

Enn er verið að ryðja í borginni eftir talsverða snjókomu síðustu daga en aðstæður eru víða slæmar fyrir gangandi og hjólandi vegfarendur. Inga Auðbjörg Kristjánsdóttir Straumland, stjórnarmeðlimur Samtaka um bíllausan lífstíl, segir mikilvægt að stígar séu vel ruddir til að fólk komist leiðar sinnar.

„Þetta er bara mikið öryggismál, ef að fólk kemst ekki leiðar sinnar með öruggum hætti þá aukast slys, sem er það sem við viljum síst sjá,“ segir Inga. „Virkir vegfarendur velja að labba á götunni þegar stígar eru ekki ruddir eða þú kemst ekki yfir á gangbrautum og það er náttúrulega bara ekki í lagi.“

Hún telur að bæta þurfi núverandi fyrirkomulag borgarinnar við ruðning í framtíðinni.

„Ég myndi vilja forgangsraða öðruvísi þannig að stígar, gatnamót virkra vegfarenda, og svæði hjá strætóskýlunum sé í algjörum forgangi af því að það léttir svo mikið á álaginu sem er á götunum,“ segir Inga.

Tekur nokkra daga að ryðja

Hjalti Jóhannes Guðmundsson, skrifstofustjóri reksturs og umhirðu borgarlandsins, segir að staðan sé ágæt þó að einhver verkefni sitji eftir.

„Það sem við erum í raun og veru að gera í dag er kannski svona annar fasi verkefnisins, það er að segja við erum búin að ryðja allt, það er tiltölulega greiðfært á stofn- og tengibrautum, en við þurfum að fara í húsagötur, fara í það að breikka götur, laga gatnamót, fara í tröppur og þess háttar verkefni,“ segir Hjalti.

Þá sé unnið eftir fremsta megni að hreinsa stíga þar sem víða eru ruðningar fyrir.

„Við erum að reyna að fara að laga það, þannig að gatnamótin verði hrein og allir samgöngumátar geti komist, en við biðjum bara fólk um að vera þolinmótt. Þetta kemur allt en það tekur okkur nokkra daga eftir svona hamfarir eins og gengu á í gær,“ segir Hjalti.

2000 kílómetrar sem þarf að ryðja

Hann telur að það muni taka allt að fjóra daga til viðbótar til að hreinsa götur og stíga almennilega en starfsmenn borgarinnar hafi unnið nánast allan sólarhringinn undanfarna daga.

„Við erum að gera okkar besta en þetta bara tekur þennan tíma að hreinsa göturnar í Reykjavík þannig allir ferðamátar geti ferðast um,“ segir Hjalti.

Hann ítrekar að um gríðarstórt verkefni sé að ræða og bendir á að þeir þurfi að ryðja um 1200 til 1300 kílómetra af götum, sem er álíka langt og Hringvegurinn, og ríflega 800 kílómetra til viðbótar af stígum.

„Þannig þetta eru kannski tvö þúsund kílómetrar sem við þurfum að ryðja með allri þeirri flækju sem fylgir. Þannig þetta er bara heljarinnar stórt verkefni.“