Net­verjar furða sig á fyrir­huguðu af­námi ein­angrunar

Willum Þór Þórsson heilbrigðisráðherra sagði í gær að hann gerði ráð fyrir að stórt skref verði stigið í afléttingum sóttvarnaaðgerða á föstudaginn. Þá verða tvær viknur liðnar frá því að stjórnvöld kynntu afléttingaráætlun sína, en stefnan er að búið verði að aflétta öllu um miðjan mars og það verði gert í þremur skrefum. 

Áætlað að sóttkví og einangrun fari á föstudag

Samkvæmt áætlun Willums verður þetta næst skref tekið á föstudag, tíu dögum fyrr en áætlað var upprunalega. Afléttingaáætlunin gerir ráð fyrir að í þessu öðru skrefi megi tvö hundruð koma saman, fjöldatakmarkanir á sitjandi viðburðum verði eitt þúsund manns. Skemmtistaðir og veitingastaðir megi hafa opið til eitt en síðustu gestir komi inn fyrir miðnætti, svo fátt eitt sé nefnt. 

Þá er áætlað að einangrun og sóttkví verði afnumin í þessu næsta skrefi, þó Willum hafi sagt í gær að fullsnemmt væri að tjá sig nákvæmlega um hvaða skref yrðu tekin. Þá hefur Þórólfur Guðnason sóttvarnalæknir ekki skilað inn minnisblaði til ráðherra með tillögum sínum að afléttingum samkvæmt heimildum fréttastofu og enn er ekki útilokað að tillögur hans verði aðrar en áætlunin gerir ráð fyrir.

„Öll mega mæta veik í vinnuna eins og í gamla daga“

Þetta hefur vakið furðu meðal netverja, þar á meðal hjá athafnamanninum Steinþóri Helga Arnsteinssyni, sem rekur meðal annars barinn Röntgen. 

„Bíddu bíddu bíddu. Á að afnema einangrun og sóttkví núna á fös en ekki grímuskyldu? Og barir mega bara hafa opið til 00/01? Er það ekki, uh... ógeðslega skrýtið?“ skrifar Steinþór á Twitter. 

Einar Örn Jónsson, íþróttafréttamaður á RÚV, segir þessa áætlun vægast sagt hafa farið öfugt ofan í menntaskólanemann á heimilinu og bendir á að samkvæmt þessu þurfi fólk ekki að fara í einangrun en menntaskólanemar geti enn ekki farið á böll. 

Og fleiri taka í sama streng. Jón Bjarni segir þessa áætlun hreint út andstyggilega.

Halldór Auðar Svansson segir að sér hafi þótt grímuskyldan minnst íþyngjandi af þeim aðgerðum sem hafa verið í gildi. 

Óskar Steinn segir loksins komið að því að Íslendingar geti mætt aftur veikir í vinnuna, eins og í gamla daga.

Sem Auður Kjerúlf er síður en svo sátt með.