Fönguðu tvo áfanga í geimskoti með myndavélum á jörðu niðri

Eins og fram kemur í frétt Space.com var myndbandið tekið 31. janúar þegar SpaceX skaut gervihnetti fyrir ítalska aðila á loft frá Flórída. Notast var við Falcon 9 eldflaug SpaceX en þær eru hannaðar til að snúa aftur til jarðar og lenda eftir geimskot.

Myndbandið hefst nokkrum mínútum eftir geimskotið. Tiltölulega snemma má sjá skilnaðinn milli eldflaugarinnar og farmsins og má sjá hreyfla eldflaugarinnar snúa henni aftur til jarðar. 

Eftir um fjórar mínútur má sjá þegar þegar farmhlífarnar losna og falla aftur til jarðar.

Með því að lenda eldflaugum aftur í stað þess að láta þær brenna upp í gufuhvolfinu hefur starfsmönnum SpaceX tekist að draga verulega úr kostnaði við geimskot. Þetta var til að mynda þriðja geimskot þessarar tilteknu eldflaugar.

Þá hafa starfsmenn fyrirtækisins sömuleiðis varið miklu púðri í að reyna að endurnýja farmhlífarnar, sem eru nokkurs konar nef eldflauga og kallast „fairing“ á ensku. Hlífarnar verja gervihnetti og annað sem skotið er út í geim frá hita og þrýstingi sem myndast við geimskot. Hlífarnar kosta margar milljónir dala.

Starfsmenn SpaceX hafa komið fyrir fallhlífum á þeim og skynjurum og reynt að grípa þær með drónaskipum.