Veitingamenn harma hversu skammt er gengið í afléttingum

Þolinmæði veitingamanna er á þrotum.

„Já, það má segja það. Viðbragðstíminn er óviðunandi og stjórnvöld virðast ekki gera sér grein fyrir alvarleika málsins",“ segir Aðalgeir Ásvaldsson formaður SVEIT. 

Veitingamenn, sem hafa mátt þreyja þorrann við mismikinn skilning stjórnvalda á Covid-tímum telja nú að mælirinn sé fullur. Þeir lýsa yfir miklum vonbrigðum með þær afléttingaráætlanir sem Willum Þór Þórsson heilbrigðisráðherra hefur boðað. Þar sé gengið alltof skammt í frjálsræðisátt ef veitingageirinn á að ná vopnum sínum. 

Í samtölum Vísis við veitingamenn kemur fram ótti um að fjöldagjaldþrot blasi nú við í greininni.

„Í það minnsta að til fjöldauppsagna gæti komið. Sú er staðan sem er búið að búa til fyrir okkur,“ segir Aðalgeir.

Engin atvinnugrein þolir annað eins og þetta

Í yfirlýsingunni segir að SVEIT fagni því að fyrstu skref afléttinga á samkomubanni séu nú tekin en harma jafnframt að ekki skuli gengið lengra í frelsisátt:

„Á undanförnum mánuðum hafa veitingahús orðið fyrir gríðarlegu tjóni vegna ákvarðana stjórnvalda og neyðarástand skapast í greininni. Brýnt er að stjórnvöld bæti tjónið með viðeigandi aðgerðum og það tafarlaust, enda eru mörg veitingafyrirtæki í miklum vanda. Ljóst er að launagreiðslur um mánaðamótin verða mjög þungar.

„Rekstraraðilar hafa barist í bökkum vegna samkomutakmarkana undanfarin tvö ár, en reynt með öllum ráðum til að halda sér á floti. 

Þetta hafa flestir rekstraraðilar gert með ómældu vinnuframlagi, skuldsetningu eða tæmt varasjóði sína. Á síðastliðnum 689 dögum hafa veitingahús starfað við fullt frelsi í eingöngu 34 daga, en annars hafa stjórnvöld skert frelsi þeirra til tekjuöflunar. Engin atvinnugrein þolir slíkar skorður á sinni starfsemi og nokkrar góðar vikur bæta á engan hátt það tjón sem orðið hefur á undanförnum tveimur árum vegna fyrirmæla stjórnvalda, sem gjarnan hefur hert tökin án fyrirvara.“

Segja réttur til atvinnufrelsis fótum troðinn

Þá harmar SVEIT að gengið sé á stjórnarskrárvarin rétt fólks til atvinnufrelsis, án eðlilegra skaðabóta, eins og það er orðað. Auk þess sem sett er fram sú krafa að tjónið verði bætt á sanngjarnan hátt áður en það verður of seint fyrir fleiri fyrirtæki í greininni.

„Ófyrirsjáanleikinn, langur viðbragðstími og gjörsamlega óviðunandi starfsumhverfi fyrirtækja á veitingamarkaði sökum samkomubanns er til skammar í okkar „frjálsa hagkerfi“ og lýðræðislega samfélagi. Því kallar SVEIT eftir beinum stuðningi tafarlaust!“

Í yfirlýsingunni er jafnframt komið inn á að fyrir liggi frumvarp með þeim yfirlýsta tilgangi að bæta umrætt tjón. Því fagnar félagið, sem telur um tæplega hundrað fyrirtæki, en telur þó þau áform ekki í neinu samræmi við fyrirliggjandi skaða.

„Hámarksbætur eru ekki í samræmi við þann fjárhagsvanda sem meirihluti veitingastaða eru komnir í. Ekki er heldur tekið tillit til hækkunar launakostnaðar, annars rekstrarkostnaðar og hækkunar opinberra gjalda á greinina, sem hefur aukið byrðar veitingastaða. Þrepaskipt skilyrði fyrir skaðabótum vegna tekjutaps eru ekki byggð upp með réttum hvata.“

Sárið ekki lagað með plástri

Hvatt er til þess að nota þekkt úrræði frá fyrstu mánuðum heimsfaraldurs svo sem Styrkur með starfi, enda sé í þeim fólgin jákvæður hvati sem styðji við þann hluta rekstrar sem mest er nauðsyn á.

„Það er með öllu óásættanlegt að eftir þriggja mánaða tímabil harðra samkomutakmarkana sé eina aðstoð frestun staðgreiðslu og tryggingargjalds. 

Gálgafrestur sem leysir ekki vandann heldur frestar honum. Eftir tveggja ára baráttu er sárið stærra en svo, að það verði lagað með plástri,“ 

segir í yfirlýsingunni en henni lýkur með afdráttarlausri áskorun:

SVEIT skorar á stjórnvöld að horfast í augu við alvarleika málsins og koma fram með beina aðstoð tafarlaust!“

Aðgerðaáætlun ríkisstjórnarinnar við afléttingar