Þórdís Kolbrún ber sig vel í einangrun og segist enn sömu skoðunar

Þrír ráðherrar Sjálfstæðisflokksins hafa nú greinst smitaðir. Þórdís Kolbrún Reykfjörð Gylfadóttir greindist á Þorláksmessu, Bjarni Benediktsson í gær og í morgun greindi Áslaug Arna Sigurbjörnsdóttir frá því að hún hefði greinst með veiruna.

Þórdís Kolbrún er nú í einangrun með fjölskyldu sinni og ber sig vel.

„Ég er algjörlega einkennalaus og sem betur fer eru krakkarnir alveg einkennalausir og maðurinn minn líka, þannig við höfum hvað það varðar yfir engu að kvarta,“ segir Þórdís en hún veit ekki hvar hún eða aðrir í fjölskyldu hennar smituðust.

Þórdís Kolbrún hefur mælt gegn íþyngjandi sóttvarnaaðgerðum og segist enn vera sömu skoðunar. Meta þurfi fleiri þætti en líkurnar á að smitast í stóra samhenginu þegar margar fjölskyldur eiga erfitt.

„Það er viðvarandi verkefni að finna eitthvað jafnvægi í þessu og ég myndi vilja meira svigrúm í umræðuna fyrir allt hitt, allt hitt sem fylgir því að bráðum eru liðin tvö ár af heimsfaraldri og áhrif á börn og ungmenni, og að framlag hópa í samfélaginu er mismikið þegar kemur að þessu verkefni,“ segir Þórdís.

„Ég hef svo sem bara meiri tíma til að hugsa um það núna þessa daga sem ég er heima,“ bætir Þórdís við.

Gott samstarf við erfiðar aðstæður

Auk ráðherranna hafa átta þingmenn greinst smitaðir, það eru allir fimm þingmenn Viðreisnar, tveir úr Sjálfstæðisflokknum og einn úr Samfylkingunni. Þingstörf fóru þó fram með nokkuð eðlilegum hætti í dag.

„Þetta hefur auðvitað áhrif á okkar störf og það var svona fáliðaður ríkisstjórnarfundurinn í morgun. Það er auðveldara að halda þinginu gangandi því hér eru auðvitað komin umtalsverður fjöldi varamanna,“ segir Katrín Jakobsdóttir forsætisráðherra.

„Maður skynjar það auðvitað að þetta hafi áhrif á þingstörfin þar sem við sitjum öll grímuklædd og ég hef það svona á tilfinningunni að fólk sé heldur að spara sig í ræðuhöldum, bara vegna stöðunnar sem er uppi,“ segir Katrín.

Hún segir enn mikla óvissu uppi í faraldrinum en vonar að fleiri ráðherrar greinist ekki með veiruna.

„Næsti reglulegi ríkisstjórnarfundarinnar verður ekki fyrr en snemma á nýju ár,i þannig ég ætla að leyfa mér að vera bjartsýn að við höldum bara ríkisstjórninni gangandi þrátt fyrir að það hafi núna einhverjir helst úr lestinni tímabundið,“ segir Katrín.

Eftir að fjárlagafrumvarpið og tekjufrumvörpin urðu að lögum um klukkan fimm frestaði forsætisráðherra fundum Alþingis til 17. janúar og þakkaði alþingismönnum og starfsmönnum þingsins fyrir gott samstarf við óvenjulegar og erfiðar aðstæður.

„Ég óska ykkur sem og landsmönnum öllum farsældar á komandi ári. Förum gætilega og hittumst heil á nýju ári,“ sagði Katrín að loknum þingfundi í dag.