Finnur Freyr: Við eigum ennþá mörg vopn inni sem við getum nýtt betur

„Mér líður bara ágætlega. Ég er bara ánægður að halda áfram að vinna leiki, um það snýst þetta. Margt jákvætt í leiknum og eins og stundum þá er eitt skref aftur í öðrum hlutum en heilt yfir bara ánægður með frammistöðuna,“ sagði Finnur Freyr.

Valsmenn hafa unnið þrjá deildarleiki í röð eftir þennan sigur og líta mjög vel út. Einnig skoruðu þeir yfir 90 stig í fyrsta sinn gegn Stjörnunni í síðustu umferð en það gerðu þeir einnig í kvöld. Liðið er komið á betra skrið samkvæmt þjálfaranum.

„Ég myndi segja að við séum komnir á betra skrið. Það er að skapast smá taktur og flæði og menn eru að komast í smá ‚rythma‘ núna innan liðsins. Við erum svona að læra á vopnin okkar og fara að nýta þau aðeins betur. Mér finnst ennþá mikið rými til bætinga og við eigum ennþá mörg vopn inni sem við getum nýtt betur þannig að ég held við þurfum að einblína á það hvernig við getum bætt því inn,“ sagði Finnur.

Með sigri kvöldsins færast Valsmenn upp í 5. sæti deildarinnar en þeir eru aðeins tveimur stigum frá þeim fjórum liðum sem deila efsta sætinu með 10 stig. Finnur segir nóg eftir af deildinni og óþarfi að pæla í töflunni að svo stöddu.

„Þessi deild er svo erfið maður, hún spilast eins og hún er. Lið detta á smá ‚run‘ og svo dala lið inn á milli. Nú styttist í landsleikjahlé og þá koma breytingar og svo gerist það aftur í janúar. Ég held það sé óþarfi að horfa of mikið í töfluna, hún segir bara hálfa söguna. Mín reynsla er að það sé betra að lið einbeiti sér að því að bæta sinn leik og að sjálfsögðu að reyna að hala inn eins mörgum stigum og hægt er en lykillinn að vera að spila eins vel og hægt er. Við erum töluvert frá því ennþá,“ sagði Finnur um stöðuna í deildinni.

Kári Jónsson byrjaði leikinn á bekknum en kom sterkur inn og skoraði lang flest stig eða 29 talsins. Liðið að finna takt og margir sem geta byrjað segir Finnur Freyr.

„Hann (Kári) er bara stórkostlegur leikmaður, ótrúlega mikil gæði í honum og við erum svolítið þannig með liðið að það eru margir leikmenn sem geta byrjað. Við erum að reyna að finna svona einhvern takt, það væri óskandi að maður gæti sett bara alla leikmenn inn á völlinn og þeir myndu bara alltaf skila því sem þeir geta skilað. Þetta snýst um samvinnu fimm aðila inná vellinum hverju sinni og í 40 mínútur. Kári gerir vel í að koma grimmur inn af bekknum og gefa okkur skorun þaðan sem hefur stundum vantað en hann var svolítið ólíkur honum í byrjun leiktíðar en hann er óðum að fara að sína sitt rétta andlit,“ sagði Finnur Freyr um Kára.

Valsmenn mæta Keflavík að viku liðinni áður en deildin fer í pásu vegna landsleikja. Finnur vildi ekkert gefa upp um breytingar á hópnum og segir alla leiki vera erfiða.

„Við bara einblínum á þann hóp sem við erum með í dag. Við erum að fara eins og öll lið inn í erfitt prógram, klárum Keflavík á föstudaginn eftir viku og það er gríðarlega stórt og mikilvægt verkefni fyrir okkur. Við viljum fara með jákvæðum huga inn í landsleikjahléð og svo bara tekur við erfið lið eftir það svo ég held að aðalatriðið hjá okkur sé eins og alltaf að einbeita okkur að okkur sjálfum og reyna að verða betri. Ég á ekki von á breytingum,“ sagði Finnur Freyr að lokum.