Færu á hausinn ef klámið yrði í alvöru bannað

Á OnlyFans geta notendur haldið úti lokuðu vefsvæði með nektarmyndum og -myndböndum af sér, sem viðskiptavinir greiða síðan fyrir aðgang að. Með breytingunum, sem OnlyFans tilkynnti í gær að taka eigi gildi í október og túlkaðar hafa verið sem tilraun til að friðþægja fjárfesta, verður bann lagt við „kynferðislegu myndefni“. 

Þó að ekki hafi verið útlistað nákvæmlega í hverju bannið felst hafa flestir túlkað það þannig að klám, sem hingað til hefur verið einn helsti grundvöllur miðilsins, verði bannað. Nekt, hvort sem hún er á formi mynda eða myndbanda, verði þó áfram leyfileg. Þrjár íslenskar OnlyFans-stjörnur taka fréttunum með fyrirvara.

„Við erum búin að senda póst á þau [OnlyFans] og þau segja að við ættum ekki að hafa neinar áhyggjur. Við höldum semsagt að þetta sé sölubrella, frekar en eitthvað annað af því að þau eru að byrja með app þar sem klám verður bannað,“ segir Ósk Tryggvadóttir.

Ósk, Birta Rós Blanco og Ingólfur Valur Þrastarson búa saman í Reykjavík og eru í svokölluðu poly-sambandi, þ.e. eiga öll þrjú saman í ástarsambandi. OnlyFans er aðaltekjulind þeirra allra; þau halda hvert úti sinni síðunni á miðlinum fyrir hundruð áskrifenda. Greint var frá því fyrr í vikunni að íslenskar OnlyFans-stjörnur þénuðu nokkrar ágætlega en Ósk, Birta og Ingólfur fást þó ekki til að upplýsa hvað þau hafa mikið upp úr krafsinu á mánuði. „Við ræðum ekki fjármálin okkar,“ segir Ósk kímin.

Síminn stoppaði ekki í gær

Þríeykið er upplitsdjarft þrátt fyrir hið boðaða klámbann, sem það gefur þó lítið fyrir, en segir íslenska OnlyFans-samfélagið vissulega hafa skolfið örlítið á beinunum þegar tilkynningin barst í gær.

„Ó, já,“ segja Ósk, Birta og Ingólfur öll í kór, innt eftir viðbrögðum starfssystkina sinna. „Það voru bara SMS allan daginn,“ segir Birta.  Ósk tekur undir þetta. „Hringingar, SMS, skilaboð bara á öllum samfélagsmiðlum,“ segir hún.

„Alltaf þegar kemur einhver svona orðrómur þá bara, það fer allt í „panic“,“ segir Ingólfur.

Þetta reddast!

Þau segjast engar áhyggjur hafa af tilkynningu gærdagsins. 

„Annars förum við bara á einhvern annan miðil. Þá er þessu bara reddað,“ segir Ingólfur.

„Við höldum bara áfram, frekar en að vera eitthvað í kvíðakasti yfir þessu. Við erum búin að fá þetta kvíðakast áður,“ segir Ósk. „Þetta reddast,“ bætir Ingólfur við.

Þá hugnast þeim ekki að snúa baki við kláminu og einbeita sér að leyfilegri nekt.

„Nei, ég myndi ekki sætta mig við það,“ segir Ósk. Ingólfur er afdráttalaus: „Ég myndi fara á hausinn.“