Prins Póló og Berglind búin að selja Karls­staði

Vísir greindi frá því í byrjun árs 2019 að Karlsstaðir væru komnir á sölu. Þá var ásett verð 220 milljónir króna, en hafði þá hækkað um tæpar 200 milljónir á 14 árum. Hjónin keyptu jörðina árið 2014.

Þau settust að ásamt börnum sínum þremur og fóru í miklar endurbætur. Þau byggðu býlið upp sem ferðaþjónustu undir nafninu Havarí, þar sem stunduð var grænmetisrækt, veitingaþjónusta, rekstur gistiheimilis og matvælaframleiðsla.

„Við keyptum þetta bara sem eyðibýli og lögðum alla okkar sál, tíma og sparifé í að byggja þetta upp og við það jókst verðgildið,“ segir Svavar í samtali við Vísi.

Hlátur og grátur við uppbygginguna

„Allt frá byrjun voru stórfjölskylda okkar og vinir tilbúnir að taka þátt í þessu með okkur og stundirnar sem við áttum þarna saman voru ævintýralega magnaðar. Handtökin voru nokkur en eitt skref í einu þá gekk þetta upp. Það var mikið hlegið en líka grátið enda ekki átakalaust að reisa þennan fagra bæ upp úr öskustónni.“

Samkvæmt nýjustu auglýsingu inni á fasteignavef Vísis má sjá að settar voru 130 milljónir á eignina sem er töluvert lægra en árið 2019.

„Ég held að það verð sem var sett á upphaflega hafi kannski verið sett á af tilfinningalegum ástæðum,“ segir Svavar en tekur fram að allir aðilar hafi gengið sáttir frá borði eftir viðskiptin.

Mikið hefur verið um dýrðir á Karlsstöðum sem fyllst hafa af lífi á sumrin frá því það opnaði. Hljómsveitirnar FM Belfast, Hipsumhaps, Góss og tónlistarmaðurinn Ásgeir Trausti voru meðal þeirra sem spiluðu á staðnum síðasta sumar.

„Við eigum eftir að sakna sveitarinnar og alls góða fólksins fyrir austan sem tók okkur opnum örmum. Við göngum sátt og hamingjusöm frá borði. Þökkum öllum sem sóttu okkur heim og óskum nýjum bændum á Karlsstöðum alls hins besta í framtíðinni.“

Að sögn Svavars eru nýjir eigendur ungt og skapandi par sem hafa nú þegar tekið við keflinu. Svavar og Berglind munu þó halda vörumerkinu Havarí, sem áfram verður tengt listviðburðum og listrænum gjörningum.

„Havarí mun áfram halda úti hressandi galleríi, bæði á netinu og í Faxafeni 10 þar sem fólk getur eignast ódauðleg listaverk eftir prinsinn og hans hirð. Ef einhverjum vantar hressleika í sitt líf þá er aldrei að vita nema prinsinn geti orðið við því. Þannig við hjónin höldum bara okkar striki.“

„Ágætt að liggja bara úti í móa og tyggja strá“

Svavar hafði þó greint frá því fyrr á árinu að til stæði að halda rekstrinum á Karlsstöðum í algjöru lágmarki nú í sumar. Hann segir það þó ekki hafa haft neitt með fyrirhugaða sölu að gera, heldur hafi hjónin verið önnum kafin í öðrum verkefnum. 

„Við erum búin að eiga sjö góð sumur, en maður hefur ekkert gert mikið annað á sumrin en að taka á móti gestum. Þannig við vildum bara eiga aðeins meira „introvert“ sumar og slaka á og njóta. Það er ágætt að fá að liggja bara úti í móa og tyggja strá,“ segir Svavar.

Hann segir óvíst hvar fjölskyldan muni setjast að næst, en þau séu alltaf með annan fótinn í Reykjavík. Það er þó ýmislegt á döfinni hjá Prins Póló en hann mun meðal annars koma fram á Hornafirði um helgina. 

„Ég er alltaf að grípa í kórónuna annað slagið svona þegar eftir því er leitað. Þegar skemmtileg tilboð berast þá er alltaf gaman að hitta gott fólk og henda í gigg.“