Hollendingar eru úr leik á EM eftir 1-0 tap gegn Tékkum á Puskas Arena í Búdapest í dag. Matthijs de Ligt fékk að líta rauða spjaldið í liði Hollendinga á 55.mínútu og Tékkar gengu á lagið og tryggðu sér sæti í átta liða úrslitum.
Hollendingar voru sterkari aðilinn framan af fyrri hálfleik, en hvorugu liðinu tókst að skapa sér nægilega hættuleg færi til að taka forystuna.
Það var því enn markalaust í Búdapest þegar dómari leiksins flautaði til hálfleiks.
Donyell Malen fékk ákjósanlegt færi á 52. mínútu til að koma Hollendingum í forystu, en Tomas Vaclik sá við honum í marki Tékka.
Stuttu seinna virtust Tékkar vera að sleppa í gegn, en Matthijs de Ligt stöðvaði sókn þeirra með hendinni.
Það tók nokkrar mínútur fyrir dómara leiksins að leysa úr því máli og að lokum fór Sergey Karasev í skjáinn góða og niðurstaðan var rautt spjald á de Ligt fyrir að handleika knöttinn.
Hollendingar þurftu því að leika seinustu 35 mínútur leiksins manni færri.
Tékkarnir gengu á lagið og á 68. mínútu voru þeir komnir með 1-0 forystu. Antonin Barak gaf boltann þá fyrir úr aukaspyrnu og Tomas Kalas skallaði boltann á Tomas Holes sem skallaði boltann í netið.
Patrik Schick kom Tékkum í 2-0 á 80. mínútu eftir að Tomas Holes átti flott hlaup inn á teiginn og fann samherja sinn með hnitmiðaðri sendingu.
Það eru því Tékkar sem eru á leið í átta liða úrslit, en Hollendingar eru á heimleið með sárt ennið.
EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.
