FH-ingar hafa aldrei unnið í Vestmannaeyjum í úrslitakeppni

Það verður Evrópukeppnisbragur á baráttunni um Íslandsmeistaratitil karla í handbolta í ár, fyrsta Íslandsmeistaratitilinn sem vinnst í meira en tvö ár. Allar viðureignir verða tveir leikir heima og að heiman þar sem betri samanlagður árangur yfir þessa tvo leiki skilar liði áfram í næstu umferð.

Átta liða úrslitin fara fram í þessari viku og hefjast með tveimur viðureignum í kvöld. ÍBV tekur á móti FH klukkan 18.00 og Haukar fá Aftureldingu í heimsókn klukkan 19.40. Báðir leikirnir eru sýndir beint á Stöð 2 Sport 4.

FH-ingar enduðu í öðru sæti deildarinnar og heimsækja Eyjamenn sem urðu í sjöunda sæti. FH vann báða leiki liðanna í vetur þar á meðal leik liðanna á dögunum í lokaumferð deildarkeppninnar.

FH er því sigurstranglegra liðið en þeir þurfa að byrja á því að fara til Vestmannaeyja til að ná hagstæðum úrslitum. Þar hafa þeir aldrei unnið í sögu úrslitakeppninnar.

ÍBV og FH hafa mæst alls fjórum sinnum í úrslitakeppni í Vestmannaeyjum og heimamenn hafa unnið alla leikina þar á meðal báða leikina í lokaúrslitunum vorið 2018.

Þetta verður þriðja úrslitakeppnin í röð sem liðin mætast því ÍBV vann báða leiki liðanna í átta liða úrslitum úrslitakeppninnar 2019.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.