Ísland áfram grænt

Uppfært kort var gefið út í gær en tölfræðin byggir á gögnum sem safnað er í vikunum á undan. Smitin sem hafa greinst innanlands á Íslandi síðustu daga eru því ekki inni í tölunum en samkvæmt covid.is er nýgengi innanlands nú 9,3 og 13,9 á landamærunum.

Litakóðarnir á kortinu sýna hvernig staðan er í hverju Evrópulandi fyrir sig varðandi faraldurinn. Land eða svæði er skilgreint grænt ef fjórtán daga nýgengi á hverja 100 þúsund íbúa er undir 25 og hlutfall jákvæðra sýna undir fjögur prósent.

Samkvæmt tölfræði Sóttvarnastofnunarinnar er nýgengi hér á landi 15,10 og er það langlægsta nýgengið af þeim löndum sem tölfræðin tekur til.

Aðeins eitt annað land er með nýgengi undir 100, það er Portúgal með nýgengið 71,09. Portúgal fær appelsínugulan lit á korti Sóttvarnastofnunarinnar. Þá eru tvö svæði í Noregi merkt með grænum lit líkt og Ísland.

Rauði liturinn á kortinu táknar að nýgengi smita sé annað hvort fimmtíu eða hærra og að hlutfall jákvæðra sýna sé fjögur prósent eða hærra eða þá að nýgengið sé hærra en 150. Eftir því sem hann er dekkri á kortinu er staðan alvarlegri.

Appelsínuguli liturinn þýðir annað hvort að nýgengið sé undir fimmtíu en hlutfall jákvæðra sé yfir fjögur prósent eða þá að nýgengið sé á bilinu 25 til 150 og hlutfall jákvæðra undir fjögur prósent.

Ljósgrátt þýðir síðan að löndin eru ekki með í tölfræðinni. Þar á meðal eru lönd sem eru utan Evrópusambandsins og Evrópska efnahagssvæðisins, til að mynda Bretland og Tyrkland.