Enginn greindist innan­lands í gær

Þetta kemur fram í uppfærðum tölum á síðunni covid.is. Tuttugu eru nú í einangrun, en voru átján í gær. 127 eru nú í sóttkví, en voru 170 í gær. 929 eru nú í skimunarsóttkví.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 1,9, sami fjöldi og í gær. Nýgengi landamærasmita er nú 4,1, en var 3,5 í gær.

12.844 eru nú fullbólusettir hér á landi og er bólusetning hafin hjá 21.174 til viðbótar.

6.072 manns hafa nú greinst með kórónuveiruna hér á landi frá því faraldurinn hófst í lok febrúar. Þá hafa 29 dauðsföll verið rakin til Covid-19 á Íslandi frá upphafi faraldursins.

Alls voru tekin 1.223 einkennasýni hjá sýkla- og veirufræðideild Landspítalans og Íslenskri erfðagreiningu í gær, umtalsvert fleiri en verið hefur síðustu vikurnar. Þá voru 356 sýni tekin á landamærunum eða í seinni landamæraskimun. Fimmtíu sýni voru tekin í svokallaðri sóttkvíar- og handahófsskimun.

Fréttin hefur verið uppfærð.