Skjálfti upp á 4,7 í nótt

Í tilkynningu frá náttúruvársérfræðingum hjá Veðurstofunni kemur fram að dregið hafi úr skjálftavirkni á Reykjanesskaga seinni partinn í gær. Hún hafi hins vegar færst aftur í aukana eftir því sem leið á gærkvöldið.

Samkvæmt vef Veðurstofunnar hafa orðið tíu jarðskjálftar á landinu sem voru 3 að stærð eða meira síðan á miðnætti í nótt. Þeir áttu allir upptök sín á Reykjanesskaga. Flestir eiga þeir sameiginlegt að eiga skráð upptök á sömu slóðum og skjálftar síðustu daga, í kring um annað hvort Keili eða Fagradalsfjall.

Telja gos ólíklegt

Prófessor í jarðeðlisfræði við Háskóla Íslands segir ekkert benda til þess nú að eldgos sé í vændum á Reykjanesskaga. Jarðskjálftahrinan sem riðið hefur yfir skagann undanfarna daga sé hins vegar ein sú öflugasta sem komið hefur á skaganum í áratugi.´

„Hún er kannski álíka og sú sem kom árið 1933 og svo ekki ósvipuð þeirri sem kom um 1970,“ sagði Magnús Tumi Guðmundsson, prófessor í jarðeðlisfræði við Háskóla Íslands, í kvöldfréttum Stöðvar 2 í gærkvöldi.

„Það er ekkert sem bendir til þess að þetta sé að fara að gerast,“ segir Magnús. Hann segir þó að ef gjósi á næstu vikum eða mánuðum sé það varla áhyggjuefni. Eldgos á Reykjanesskaga séu frekar lítil en þau geti hins vegar verið nálægt byggð.