Rúmlega fimm þúsund skjálftar hafa mælst á suðvesturhorninu frá því að hrinan hófst.
Jörð nötrar á suðvesturhorninu þar sem stórir jarðskjálftar hafa mælst í dag og ekkert lát virðist vera á skjálftavirkninni sem verið hefur á Reykjanesi undanfarna tvo sólarhringa. Stór skjálfti að stærð 4,4 reið yfir upp úr hádegi en um þrjátíu skjálftar yfir þrír að stærð hafa mælst í dag.
Á milli klukkan 11:59 og 14:00 mældust fjórtán jarðskjálftar 3 til 4,4 að stærð. Þeir hafa allir fundist á höfuðborgarsvæðinu og þeir stærstu einnig á Suðurlandi, á Akranesi og í Borgarnesi. Þessi virkni er með upptök í nágrenni við stærsta skjálfta hrinunnar sem reið yfir í fyrradag og var 5,7 að stærð.
Mikil óvissa
Kristín Jónsdóttir, jarðskjálftafræðingur, segir að óvissa ríki um framhaldið.
„Það er auðvitað mikil óvissa. Við erum greinilega bara í miðri hrinu þannig að það er erfitt að spá í framhaldið. Það leit allt út fyrir það í gær og í morgun að það væri að draga úr þessu en svo tekur hrinan sig upp að nýju. Þetta er svo sem eitthvað sem við höfum séð áður. Þær eiga þetta til þessar hrinur.“
Þannig það er óvissuástand?
„Já það er óvissuástand, ég myndi segja það,“ sagði Kristín í kvöldfréttum Stöðvar2.
Hún segir enn engin merki um eldvirkni.
„Á meðan að hrinan er i gangi eru auknar líkur á því að það verði stærri skjálfti og allt að 6,5. Þá erum við að horfa fyrst og fremst á svæðið á milli Brennisteinsfjalla og Bláfjalla að þar gæti komið stærri skjálfti. Virknin sem við höfum séð núna undanfarinn sólarhring er að mestu bundið við Fagradalsfjall og það er frægt fyrir miklar hrinur. Við sjáum engin merki um eldvirkni,“ sagði Kristín.
Búið að draga upp líklegustu sviðsmyndirnar
En gæti verið kvikuinnskot eða kvika á hreyfingu sem kemur ekki í ljós?
„Já það er ekki hægt að útiloka að slíkt sé í gangi en það er allavegana ekkert sem kemur fram á þessum myndum og engar afgerandi mælingar sem við höfum fengið sem benda til þess að það sé eitthvað grunnt en það er ekki hægt að útiloka það að það sé dýpri kvikuvirkni í gangi,“ sagði Kristín.
„Auðvitað er það þannig að þetta belti, það eru bæði þessar landrekshreyfingar sem marka það og líka eldvirkni og það má segja að 90 prósent af kviku sem kemur inn í kerfið festist inni í skorpunni, það er bara 10 prósent sem kemur upp,“ sagði Kristín.
Ákveðin tímamót
Er þetta áhyggjuefni?
„Það er alltaf óþægilegt þegar það er óvissa en ég held að við höfum dregið upp þessar líklegu sviðsmyndir.“
Kristín segir að leita þurfi aftur um fimmtíu ár til að finna sambærilega hrinu og nú hér á landi
„Þannig þetta eru tímamót núna.“
Vísir hefur fylgst með gangi mála jafnóðum í vaktinni sem er neðst í fréttinni hér að neðan. Þar má sjá umfjöllun um skjálftahrinuna í dag sem og síðustu tvo sólarhringa.
