Telur drónaeftirlit Fiskistofu ólöglegt en fordæmir brottkast

Elín Björg Ragnarsdóttir sviðsstjóri veiðieftirlits hjá Fiskistofu segir að eftir að byrjað var að nota dróna markvisst við eftirlit með veiðum í janúar á þessu ári hafi fjöldi mála, þar sem rannsakað er hvort ólöglegt brottkast hafi átt sér stað, margfaldast milli ára. Meðal þess sem hafi sést sé ólöglegt brottkast á ýsu og stórum þorski. 

Arthur Bogason  formaður Landssambands smábátaeigenda fordæmir brottkastið en gagnrýnir hvernig eftirlitinu er háttað.

„Við bara hvetjum bara menn til að gera alls ekki svona hluti. Við erum að ganga um sameiginlega auðlind þjóðarinnar og það á að ganga snyrtilega um hana og þetta er ekki hluti af því. Við gagnrýnum hins vegar hvernig þetta eftirlit með drónum hefur verið framkvæmt.  Við teljum ekki ekki nóg að setja frétt í blöðin um að það eigi að fara að stunda drónaeftirlit með fiskveiðum. Mér hefði til dæmis þótt eðlilegt að Fiskistofa hefði tilkynnt að Reykjanessvæði yrði vaktað áður en hún hóf drónaeftirlit þar á árinu.  Við viljum bara að farið sé að lögum í þessum efnum og teljum að það sé ekki gert með núverandi vinnubrögðum,“ segir Arthur. 

Telur ólöglegt að láta ekki vita fyrirfram af eftirliti

Aðspurður um hvort ekki megi bera saman aðferðina við hraðaeftirlit lögreglu þar sem ökumenn vita ekki allta fyrirfram hvar og hvenær eftirlit fer fram, svarar Arthur: 

„Þetta er mjög skýrt í lögum og ef  ef lögregla er að hraðamæla án þess að vera sýnileg þá er hún ekki að fara að lögum,“ segir Arthur.   

Telur skorta á eftirlit með brottkasti á  stórum fiskiskipum 

Hann telur eðilegast að hafa fyrirfram fælingarmátt með eftirlitinu.  Þá telur hann að Fiskistofa hafi ekki gætt jafnræðis við eftirlitið. 

„Eitt sem við höfum bent á er að menn velti fyrir sér hvað Fiskistofa á mörg myndbönd af stórum fiskiskipum við brottkast. Smábátaflotinn veiðir um 16% af botnfisksaflanum við Ísland en öll myndböndin sem þeir eru með eru af litlum bátum nálægt ströndum í góðu veðri, Hvernig væri nú að fara stunda alvöru eftirlit með 84% flotans?,“ spyr Arthur. 

Aðspurður um hvort hann telji að það sé meira brottkast á stórum skipum svarar Arthur. 

„Ég held að það sé stundað brottkast á mjög mörgum skipum en hversu mikið það er , vitum við ekki. Það hefur ekkert verið hægt að mæla það,“ segir hann. 

Aðspurður hvort ekki væri hægt að nota dróna við slíkt eftirlit svo hægt sé að komast að því segir Arthur:

„Jú gerum það og höfum þá jafnræði með eftirlitinu. Tilkynntu þá á viðkomandi svæðum að það verði eftirlit,“ segir Arthur. 

Landssambandið ætli að senda erindi vegna drónaeftirlits Fiskistofu til persónuverndar.

Okkar skylda er að hafa eftirlit með veiðum

Elín Björg Ragnarsdóttir sviðsstjóri Fiskistofu  segist þekkja þessa gagnrýni. 

„Mönnum finnst við fylgjast óþægilega mikið með þeim. En þeir verða að gera sér grein fyrir því að þetta er eftirlitsskyld starfsemi og okkur ber að hafa eftirlit með þeim. Þá höfum við verið hvött til að gefa út hvar við ætlum að fljúga en við erum búin að vera að kynna eftirlitið víða, það hefur verið auglýst og er  á vef Fiskistofu.   Þetta tæki er eins og hvert annað eftirlitstæki. Þá bendi ég á að  drónarnir eru ekki á upptöku fyrr en menn sjá að verið er að kasta afla fyrir borð. Þá fyrst er sett á upptöku,“ segir Elín.  

Hún segir að starfsfólk sé að þjálfa sig í að nota drónanna og næsta skref sé að nota þá við eftirlit á stærri skipum sem séu lengra út á hafi. 

„Við  förum ekki langt frá landi eins og er en stefnum á að hafa eftirlit með stærri skipum.  Við þurfum meiri þjálfun til að gera það,“ segir Elín. 

Persónuvernd kannar hvort hún eigi að kanna málið

Persónuvernd tilkynnti á vef sínum í gær að hún ætli að skoða  hvort tilefni sé til að kanna drónaeftirlit Fiskistofu.