Íþróttaáhugafólk ósátt við áframhaldandi áhorfendabann

Ingvi Þór Sæmundsson skrifar 5. febrúar 2021 14:01

Þessir stuðningsmenn KR þurfa að bíða eitthvað lengur eftir því að geta mætt á leiki liðsins. vísir/bára

Áhorfendur verða áfram óheimilaðir á íþróttaviðburðum þegar ný reglugerð um fjöldatakmarkanir tekur gildi á mánudaginn, 8. febrúar.

Svandís Svavarsdóttir heilbrigðisráðherra greindi frá þeim breytingum á sóttvarnareglum sem taka gildi næsta mánudag eftir ríkisstjórnarfund í Ráðherrabústaðnum í morgun. Svandís féllst á allar tillögur Þórólfs Guðnasonar sóttvarnalæknis. Nýja reglugerðin gildir til 3. mars.

Meðal breytinga sem verða gerðar á sóttvarnareglum eru að hámarksfjöldi er varðar sviðslistir, útfarir og fleira fara úr hundrað manns í 150. Þá verða fjöldatakmörk í söfnum og verslunum hækkuð sömuleiðis.

Enn verður þó bið á því að áhorfendur fái að mæta á íþróttaviðburði. Þeir hafa verið óheimilaðir frá því í október.

Margt íþróttaáhugafólk klórar sér í höfðinu yfir áframhaldandi áhorfendabanni, sérstaklega þar sem fleiri mega vera viðstaddir sviðslistasýningar, og lýsti yfir óánægju sinni á Twitter.

Meðal þeirra er Hafliði Breiðfjörð, framkvæmdastjóri Fótbolta.net.

Stundum er erfitt að skilja rök í sóttvarnaraðgerðum. Í innandyrasalnum var verið að auka fjöldatakmarkanir úr 100 í 150. Í utandyra stúkunni sem er miklu stærri mega vera 0 eftir tilslakanir á mánudaginn. #fotboltinet pic.twitter.com/TcoXZ7zTxY
— Hafliði Breiðfjörð (@haflidib) February 5, 2021

Jón Stefán Jónsson, íþróttafulltrúi Þórs á Akureyri, er einnig undrandi og spyr sig hvort ÍSÍ hafi ekki reynt að koma hugmyndum sínum á framfæri við stjórnvöld.

Jæja það er þá öruggara að fara á krá, í ræktina, í bío en að hleypa 50 manns á íþróttaleik. Hvernig gengur hjá ÍSÍ að koma hugmyndum til þeirra sem þessu stjórna ? Eða var það bara kannski ekki gert ?
— Jón Stefán Jónsson (@Jonsi82) February 5, 2021

Hér fyrir neðan má sjá fleiri dæmi um ósátt íþróttaáhugafólk á Twitter.

Sterkur endir á vikunni hjá VG:

Í gær: Engin netverslun með áfengi á okkar vakt, takk.

Í dag: 50% aukning á leyfilegum áhorfendafjölda í leikhúsum en áfram gamla góða núllið á áhorfendur á íþróttaviðburðum.
— Daníel Rúnarsson (@danielrunars) February 5, 2021

Þetta hljóta að vera mistök í nýrri reglugerð að fjölga leikhúsgestum, opna bari og skemmtistaði en það megi ekki vera áhorfendur á íþróttakappleikjum. Neita að trúa því að þetta verði svona.
— Úlfur Arnar Jökulsson (@UlfurArnar) February 5, 2021

Þvílík vonbrigði
— Elfa Björk (@ElfaBSig) February 5, 2021

Þessi brandari hjá Þórólfi og Svandísi er orðinn helvíti þreyttur. Úff.
— Henry Birgir (@henrybirgir) February 5, 2021

Vonandi man fólk sem tengist íþróttum, hvernig tekið hefur verið á þessum RISASTÓRA parti af lífinu, næst þegar það gengur inn í kjörklefann. Endilega förum í sleik í leikhúsi en guð forði því að fólk horfi á íþróttir. #MælirFullur
— Benedikt Gretarsson (@bennigretars) February 5, 2021

Faraldur kórónuveiru (COVID-19)

Mest lesið

Fleiri fréttir