Tottenham átti ekki í teljandi vandræðum með botnlið ensku úrvalsdeildarinnar þegar Sheffield United fékk lærisveina Jose Mourinho í heimsókn á Bramall Lane í dag.
Leikurinn var aðeins fimm mínútna gamall þegar Serge Aurier skallaði hornspyrnu Son Heung Min í netið.
Harry Kane tvöfaldaði forystu gestanna skömmu fyrir leikhlé þar sem leikmenn Tottenham voru fljótir að refsa Oliver Norwood fyrir slæm mistök í uppspili Sheffield manna.
Heimamenn gáfust ekki upp og náðu að minnka muninn í 1-2 á 59.mínútu þegar David McGoldrick skoraði.
Tottenham voru fljótir að svara því Tanguy Ndombele gerði út um allar vonir heimamanna á 62.mínútu þegar hann skoraði eftir stoðsendingu Steven Bergwijn.
Lokatölur 1-3 fyrir Tottenham sem lyftir sér upp í fjórða sæti deildarinnar, með þremur stigum minna en topplið Manchester United. Sheffield United eftir sem áður á botni deildarinnar.
