Eitt mark skildi Chelsea og Fulham að þegar liðin mættust í nágrannaslag í ensku úrvalsdeildinni í dag.
Chelsea voru án sigurs í þremur leikjum í röð í deildinni þegar kom að leiknum og því gríðarlega mikilvæg stig í húfi fyrir Frank Lampard og lærisveina hans.
Leikurinn var jafn og spennandi en á lokamínútum fyrri hálfleiks fékk Antonee Robinson að líta rauða spjaldið fyrir glæfralega tæklingu á Cesar Azpilicueta.
Chelsea gekk illa að nýta sér liðsmuninn en á 78.mínútu fann Mason Mount leiðina í mark Fulham þegar hann nýtti sér mistök Alphonse Areola í marki Fulham.
Reyndist það eina mark leiksins og kærkominn 0-1 sigur Chelsea staðreynd.
