Gerði samning við fimm­tán ára Guð­jón Val að hann mætti æfa með meistara­flokki færi hann eftir fyrir­mælum

Gauti Grétarsson, sem var fyrsti þjálfari Guðjóns Vals Sigurðssonar í meistaraflokki, segir að Guðjón Valur hafi fengið tækifæri hjá Gróttu/KR eftir að allir liðsfélagar hans í 3. flokki hafi hætt.

Guðjón Valur lagði skóna á hilluna eins og kunnugt er á dögunum en Guðjón er að mörgum talinn einn besti íþróttamaður í sögu Íslands. Gauti var til viðtals hjá Svövu Kristínu Grétarsdóttur í Sportpakka kvöldsins.

„Þegar hann fór í 3. flokk þá hættu allir sem voru með honum í liðinu og hann verður einn eftir í 3. flokki. Þá voru engar æfingar svo hann kemur til mín og spyr hvort að hann megi æfa með meistaraflokki,“ sagði Gauti.

„Ég var búinn að fylgjast með honum í gegnum tíðina. Hann var duglegur úti að leika sér og hreyfði sig mikið. Hann var alltaf að svo ég geri samning við hann að hann megi vera með geri hann allt sem ég segi honum að gera.“

Gauti segir að liðsfélagar Guðjóns úti á Seltjarnarnesi hafi hjálpað honum mikið á sínum fyrstu árum.

„Hann var mjög heppinn með spilfélaga á þessum tíma. Þeir hvöttu hann mikið. Við vorum í æfingabúðum í Danmörku og spiluðum gegn Flensburg. Þá lét ég hann byrja gegn þeim sem voru eitt besta liðinu í Þýskalandi.“

„Ég setti hann fyrir framan vörnina og ég lét hann hafa það verkefni að klukka þá eins mikið og hann gæti svo hann myndi finna að þeir væru mannlegir. Svo þegar leikurinn var búinn og hann hafði staðið sig mjög vel og upplifað þetta þá segir hann: Svona ætla ég að verða þegar ég verð stór.“