Telur nauðsynlegt fyrir Icelandair að fá fjármagn frá lífeyrissjóðum

Lífeyrissjóðir bíða eftir hlutafjárútboði Icelandair en þeir eiga tæpan helming í félaginu. Formaður Lífeyrissjóðs verslunarmanna segir að aðeins verði fjárfest ef fyrirsjáanlegt sé að fjármunirnir skili viðunandi ávöxtun. Fyrrverandi forstjóri Icelandair telur að félagið fari í þrot komi sjóðirnir ekki með fjármagn.

Icelandair ætlar um mánaðarmótin að segja upp stórum hluta starfsmanna félagsins. Þá hefur forstjóri félagsins sagt að það lifi ekki af sumarið nema nýtt fé komi inn. Nú sé stefnt á að gefa út nýtt hlutafé fyrir fjárfesta og hugsanlega komi ríkið í framhaldinu með lánalínur. Ekki er komin önnur tímasetning á útboðið en að það sé á næstunni.

Ellefu lífeyrissjóðir eru meðal tuttugu stærstu eigenda Icelandair og þar af fer Lífeyrissjóður verslunarmanna með næst stærstan hlut uppá um 12%. 

Þurfa að vera rekstrarlegar forsendur fyrir áframhaldi á fjárfestingu

Stefán Sveinbjörnsson formaður sjóðsins segir að það þurfi að yfirfara útboðsgögn frá Icelandair áður en fjárfest verði frekar í félaginu.

„Það þurfa að vera rekstrarlegar forsendur fyrir því að það eigi að fara að fjárfesta í félagi eins og þessu sem og öðrum félögum sem sjóðurinn hefur fjárfest í. Þannig að þeir fjármunir sem fara þar inn skili sér með viðunandi ávöxtun miðað við þá áhættu sem verið er að taka,“ segir Stefán. 

Beðið með ákvarðanir

Fréttastofa leitaði viðbragða hjá öðrum lífeyrissjóðum í dag og fékk svör frá Birtu, Lífeyrissjóði starfsmanna sveitarfélaga og Almenna lífeyrissjóðnum þar sem einnig kom fram að beðið er með allar ákvarðanir þar til Icelandair skilar útboðsgögnum. 

Jón Karl Ólafsson fyrrverandi forstjóri Icelandair segir mikla óvissu framundan og margir standi frammi fyrir að velja á milli vondra, verra eða verstu kosta. Hann telur mikilvægt að sjóðirnir fjárfesti áfram í félaginu.

„Versti kosturinn varðandi Icelandair væri ef lífeyrissjóðirnir vilja ekki gera neitt og félagið lendir á endanum í þroti sem við vonum að verði ekki, því þar með myndu lífeyrissjóðirnir tapa öllu fjármagninu í félaginu. Ég held að það væri miklu betra fyrir lífeyrissjóðina að verja stöðu félagsins.“ segir Jón Karl. 

 Erfitt að finna nýja fjárfesta

Jón segir að langflest flugfélög í heiminum eigi í basli og því sé erfitt að leita að erlendum fjárfestum. 

Staðan er svo óljós og það er eiginlega ómöglegt að sækja erlent fjármagn eins og staðan er nú, “ segir Jón Karl. 

Hann segir að víða séu stjórnvöld að hlaupa undir bagga hjá flugfélögum.

Almennt hafa flugfélög verið að fá ríkisaðstoð vegna stöðunnar. Félag eins og Lufthansa er að biðja um ríkisaðstoð, sem er eitthvað sem maður hélt að myndi aldrei koma upp, SAS, Norwegian og KLM eru að fá ríkisaðstoð.  Listinn er ótæmandi. Þegar tekjufallið er algjört þá verða menn að fá hjálp til að komast til gegn.  Þetta er verkefni sem allir eru að fara í gegnum ekki bara Icelandair,“ segir Jón Karl.