Ljóst að ekki verði öllum fyrirtækjum bjargað

Sextíu milljarða króna aðgerðapakki ríkisstjórnarinnar, til viðbótar við þá tvö hundruð og þrjátíu milljarða sem kynntur var fyrir mánuði, var kynntur síðdegis í dag.

Komið verður til móts við fyrirtæki sem hætta þurftu starfsemi og minni og meðalstór fyrirtæki geta fengið hagstæð lán með ríkisábyrgð. Þá verður komið til móts við ýmsa hópa fólks sem hafa orðið illa úti í kórónufaraldrinum.

Úrræði stjórnvalda hafa að sögn forystu ríkisstjórnarinnar nýst verulega vel hingað til. Fjármálaráðherra segir þó ljóst að ekki verði öllum fyrirtækjum bjargað.

“Við erum auðvitað í fyrsta lagi að leggja verulega áherslu á félagslegar aðgerðir til þess að geta grípa strax inn í hjá þeim sem að núna eiga í erfiðleikum. Í öðru lagi er þetta stórar aðgerðir gagnvart litum og meðal stórum fyrirtækjum. Við erum í raun og vera að reyna að ná til þeirra sem kannski þurfa að bíða lengur eftir brúarlánunum sem við kynntum í fyrsta pakkanum, með því annars vegar að hafa styrki til fyrirtækja sem þurftu að loka og hins vegar stuðningslánin fyrir smærri fyrirtæki. Og í þriðja lagi erum við að boða stórsókn þegar kemur að nýsköpun, þekkingargeira, matvælaframleiðslu og skapandi greinum,” sagði Katrín Jakobsdóttir, forsætisráðherra í aukafréttatíma fréttastofu Stöðvar 2, Vísis og Bylgjunnar síðdegis.

“Við erum að sjá dýpri kreppu heldur en við áður spáðum. Við sjáum það að Alþjóða gjaldeyrissjóðurinn hefur spá mestu efnahagskreppu í heiminum, það er nú engin smá yfirlýsing, síðan í kreppunni miklu. Við förum ekki varhluta af þessu. Við finnum fyrir því hér að það er mikið tekjufall hjá mörgum og til þess að koma í veg fyrir keðjuverkun sem af þessu hlýst þá erum við að tryggja með fyrri aðgerðarpakka og núna þessum úrræðum að fyrirtæki geti betur staðið í skilum, greitt laun og gert áætlanir um það hvernig menn komast út úr þessu ástandi,” sagði Bjarni Benediktsson, fjármálaráðherra.

Teljið þið að þessar aðgerðir sem kynntar hafa verið séu nóg?

“Eins og ég sagði þá er þetta ekki örugglega síðasti aðgerðarpakkinn og það er það er margt annað sem er í vinnslu hjá okkur, en það er líka mikilvægt að við komum þessum aðgerðum í virkni jafn óðum,” sagði Katrín.

Það eru mörg fyrirtæki sem hafa orðið fyrir tekjufalli vegna kórónuveirunnar og það verður þannig áfram. Fyrirtæki sem jafnvel geta ekki haldið fólki í tuttugu og fimm prósenta starfi og farið hlutabótaleiðina. hvað kemur þessi pakki og sá fyrsti til með að fleyta þessum fyrirtækjum langt?

“Við getum séð úrræðin og spurt okkur, eru þau að nýtast. Fjöldi þeirra sem eru komnir á úrræðin segja að þau eru að nýtast gríðarlega vel,” segir Bjarni.

Líklegt að alda gjadþrota muni ríða yfir

“Ég held að það sé óumflýjanlegt við svona aðstæður þar sem við erum að fara inn í mesta efnahagssamdrátt mögulega í hundrað ár að við sjáum aukningu í gjaldþrotum. Ég sá fréttir um það strax í dag að sumir eru þegar komin í gjaldþrot,” sagði Bjarni.