Geta keypt miða á leik sem fer aldrei fram og fengið með hamborgara sem verður aldrei borðaður

Íslandsmeistarar KR ætla að fara sömu leið og bikarmeistarar Stjörnunnar til að safna pening fyrir körfuboltadeildina eftir að úrslitakeppnin datt upp fyrir.

Engin úrslitakeppni fer fram í Domino´s deildunum í körfubolta í ár og því fylgir gríðarlegt tekjutap fyrir þau lið sem hafa veðjað á það að komast langt í úrslitakeppninni í ár.

Stjarnan ákvað að fara þá leið í síðustu viku að selja miða á leik sem fer aldrei fram og setja með því áhorfendamet í Mathús Garðabæjarhöllinni.

KR hefur nú sett af stað samskonar söfnun undir merkjunum: „Stöndum Saman – Sláum aðsóknarmet í DHL-höllina!“

„Í ljósi þess að úrslitakeppnin hefur verið blásin af og KKD KR orðið fyrir verulegum tekjumissi þá ætlum við að slá aðsóknarmetið í DHL-Höllinni með því að selja miða á leik sem mun ekki fara fram eins og gefur að skilja. Aðsóknarmetið er 2500 manns og það er von deildarinnar að sem flestir taki þátt í þessu verkefni og saman slái það met og um leið styrki við starf og rekstur deildarinnar,“ segir í kynningunni á viðburðinum.

Hægt er að kaupa tvenns konar miða en með flottari miðanum fá menn líka ímyndaðan hamborgara með.

Miði á leikinn kostar 2500 krónur en það kostar 4000 krónur að fá burger, drykk og miða á leikinn sem fer auðvitað aldrei fram.

Það má sjá meira um þetta hér fyrir neðan.