Ís­lenskar get­raunir gefa í­þrótta­fé­lögum landsins sex­tíu milljónir

Þau sextíu félög sem hafa selt mest og fengið flest áheit með sölu á getraunaseðlum fá aukaframlag upp á tíu milljónir króna.

Íslenskar getraunir gáfu frá sér tilkynningu þess efnis í dag. Er þetta gert vegna mikillar þátttöku íslenskra tippara á árinu 2020.

Knattspyrnufélög fá 38 milljónir króna

Það er ljóst að knattspyrnufélög landsins munu njóta hvað mest en þau fá alls 38 milljónir króna af þeim 50 sem settar voru í styrkinn.

Fyrir hvert lið í Pepsi Max deild karla eða kvenna fæst ein milljón króna. Félög með lið í báðum deildum fá þar af leiðandi tvær milljónir. Félög með lið í Lengjudeildinni fá 600 þúsund á lið og að lokum fá félög með lið í 2. deild 150 þúsund krónur á lið.

Íþróttasamband fatlaðra fær hæstan styrk

Af þeim tíu milljónum sem settar voru í aukaframlag þá fara 2.4 milljónir til íþróttasambands fatlaðra. Þar á eftir kemur Víkingur í Reykjavík með 900 þúsund krónur og knattspyrnufélagið Framherjar frá Vestmannaeyjum fékk 700 þúsund krónur.

Ástæðan er einfaldlega sú að þetta eru þrjú söluhæstu íþróttafélög landsins.