„Núna er bara kominn tími til að opna skólana“

„Við erum að horfa á krakkana okkar sitja heima, dag eftir dag, í fjarnámi. Þeir fara ekki mikið út og eru í takmörkuðum félagslegum samskiptum við vini og orðin langeygð á að komast í skólann,“ segir Vala Pálsdóttir, móðir nemanda í framhaldsskóla. Hún hefur áhyggjur af því að skólarnir hafi enn ekki verið opnaðir og þau langtímaáhrif sem lokunin kunni að hafa á börnin.

Létt var á samkomutakmörkunum í framhaldsskólum í vikunni þegar heimilað var að 25 mættu vera saman í rými í stað tíu. Það hefur þó litlu breytt fyrir almenna kennslu því fæstir skólar hafa ákveðið að hefja staðnám að nýju.

Óttast félagsleg áhrif

„Ég óttast bæði félagsleg áhrif, einveru, og óttast líka langtímaáhrifin á kennslunni. Hvernig koma börnin undirbúin fyrir næstu verkefni, hvort sem það er háskólinn eða atvinnumarkaðinn. Ég held líka að sumir muni lengja í náminu, fækka áföngum eða jafnvel gera hlé á því. Það þýðir það að við verðum kannski með enn fleiri nemendur sem vilja vera í náminu. Ég veit ekki hvort kerfið tekur við því,“ segir hún.

Unnið dag og nótt að úrbótum

Rannsóknir hafa sýnt fram á aukna vanlíðan menntaskólanemenda og þá metur næstum annar hver nemandi á fyrsta ári námsárangur sinn verri en í venjulegu árferði. Heimili og skóli - Landssamtök foreldra hafa ekki farið varhluta af áhyggjum foreldra og þá fyrst og gagnrýna þá helst óvissuna sem nú hafi ríkt lengi. Lilja Alfreðsdóttir menntamálaráðherra segir að verið sé að leita lausna.

„Ég skil mjög vel áhyggjur foreldra, ég hef líka þessar áhyggjur,“ segir hún. „Og þess vegna hef ég beitt mér mjög í þá veru að auka allt staðnám. Við þurfum að vera sveigjanleg líka í þessu. Við verðum líka að muna að við erum á þessum óvissutímum. Nú er allt kapp lagt á það að koma á sem mestu staðnámi. Sums staðar hefur það tekist. Við höfum verið að forgangsraða í þágu verk- og listnáms en ég get fullvissað foreldra og alla að við erum að vinna að þessu dag og nótt,“ bætir Lilja við.

Skilningurinn á þrotum

Vala segir að þessu hafi verið sýndur skilningur í vor en að nú sé komið gott. „Aðstæður eru erfiðar en núna er bara kominn tími til að opna skólana. Það er gluggi núna,“ segir hún.

Þær Auður Erla Hrannarsdóttir, Sara Kamban Þorláksdóttir og Sara Diem eru nýnemar við Menntaskólann í Sund. Þær hafa beðið spenntar eftir þessu fyrsta ári sínu í menntaskóla lengi og lögðu mikið á sig til að komast inn í skólann. Þær voru spenntastar fyrir félagslífinu en hafa nánast ekkert fengið að mæta í skólann og sinnt öllu sínu námi í gegnum tölvu og fjarfundabúnað. 

„Mér líður ekkert eins og ég sé í menntaskóla. Maður vaknar bara, opnar tölvuna, er upp í rúmi og ekkert með jafn mikinn metnað,“ segir Auður Erla. „Við vorum að búast við þremur skemmtilegustu árum lífs okkar,“ segir Sara Kamban sem var spenntust fyrir félagslífinu í MS.

Þær eru líka allar sammála um að erfitt sé að læra einn heima hjá sér.

„Það er ógeðslega erfitt að einbeita sér heima. Það er svo auðvelt að fara bara að gera eitthvað annað,“ segir Sara Diem.

Í skriflegu svari frá menntamálaráðuneytinu segir að allir framhaldsskólar leitast við að halda úti staðnámi nema í verklegu námi á starfs- og listnámsbrautum og starfsbrautum fyrir fatlaða. Sveigjanleiki skóla hafi verið aukinn með breytingum á sóttvarnareglum í vikunni en að ekki liggi fyrir upplýsingar um fyrirkomulag náms í hverjum skóla.

„Aðstaða skólanna til þess að bregðast við og endurskipuleggja sig eru afar mismunandi, enda starfsemi þeirra og húsakostur fjölbreyttur. Nokkrir skólar hafa þegar skipulagt skólastarf út önnina en opna skólabyggingar meira nú til þess að nemendur geti sótt þar aukatíma, fengið lesaðstöðu eða rými til hópavinnu,“ segir í svarinu.