Tveir menn á fer­tugs­aldri játuðu röð inn­brota í Kópa­vogi

Tveir menn á fertugsaldri hafa játað að hafa staðið fyrir fjölda innbrota í Sunnusmára í Kópavogi í síðasta mánuði.

Frá þessu segir í tilkynningu frá lögreglunni á höfuðborgarsvæðinu en um var að ræða innbrot í bæði geymslur og hjólageymslur og þar sem þjófarnir hafi stolið öllu steini léttara, meðal annars reiðhjólum, matvælum og húsmunum af ýmsu tagi.

Lögreglan segir að í fyrstu hafi verið á litlu að byggja við rannsókn málsins, en að með „þrautseigju og útsjónarsemi“ hafi lögreglu tekist að komast á slóð hinna óprúttnu aðila, sem reyndust vera tveir karlar á fertugsaldri. Hafa þeir báðir játað sök.

„Framkvæmdar voru húsleitir í þágu rannsóknarinnar og var lagt hald á mikið af þýfi. Undanfarið hefur verið unnið að því að koma hlutunum aftur í réttar hendur, en eitthvað af þýfinu hafði þegar verið selt á sölusíðum á netinu.

Af því tilefni hvetur lögreglan fólk til árvekni þegar keyptir eru hlutir á sölusíðum á netinu, t.d. að seljandi sýni kvittun fyrir vörunni. Of oft gerist það að mati lögreglu að þýfi finnst í fórum kaupenda sem bera við að þeir hafi ekki vitað að varan var stolin, vita ekki nafn seljanda, heimilisfang eða annað sem að gagni má koma við rannsókn málsins, en finnst engu að síður sárgrætilegt og ósanngjarnt að varan sé af þeim tekin og komið í vörslu réttmæts eiganda,“ segir í tilkynningunni.