Fluttu hjálpargögn en ekki vopn til Jerevan

Fjölmiðlar í Aserbaídsjan segja að vopn hafi verið flutt frá Íslandi til Armeníu um helgina og hafa vísað til fragtflugvélar Icelandair sem flogið var frá Keflavík til Jerevan, höfuðborgar Armeníu. Icelandair segir þó að hjálpargögn hafi verið í flugvélinni, ekki vopn. Armenía og Aserbaídsjan eiga nú í stríði um héraðið Nagorno-Karabakh.

Ásdís Ýr Pétursdóttir, upplýsingafulltrúi Icelandair, segir í svari við fyrirspurn fréttastofu að hjálpargögnin séu frá bandarísku góðgerðasamtökunum Armenia Fund sem starfrækt eru í Los Angeles í Bandaríkjunum.

„Um var að ræða meðal annars búnað fyrir fyrstu hjálp, sjúkrarúm, svefnpoka og fatnað. Icelandair Group tekur að sér ýmis leiguflugsverkefni í gegnum Loftleiðir Icelandic og Icelandair Cargo og er þetta eitt af þeim. Verkefnið kemur þannig til að félagið hefur um nokkurt skeið flogið þessa flugleið í leiguflugi með farþega á milli Bandaríkjanna og Armeníum,“ segir í svari Ásdísar.

Staðhæfa um vopnaflutninga

Axar.az segir vopn hafa verið flutt frá Keflavík til Jerevan á sunnudaginn. Þá var flugvél Icelandair flogið til Jerevan.

Í umfjöllun Azeri Daily, frá því um helgina, er staðhæft að um flugvélin hafi verið ekki verið notuð til að flytja lyf, matvæli og föt, heldur vopn. Rússnesk vopn sem hafi verið keypt af einkaaðilum. Vert er að taka fram að lítið sem ekkert er vitnað í heimildir í grein Azeri Daily og ber hún mörg ummerki áróðurs.

Þá er sömuleiðis rétt að benda á að fjölmiðlafrelsi í Aserbaídsjan er verulega takmarkað.

Ríkisdagblaðið Azadliq birti svipaða frétt í gær þar sem talað var um vopnasendingar til Armeníu undir yfirskini góðgerðasendinga. Ísland eða Icelandair var þó ekki nefnt í þeirri frétt og önnur góðgerðasamtök en Armenia Fund.

Í svari Samgöngustofu við fyrirspurn fréttastofu segir að engin heimild til vopnaflutninga hafi verið veitt á þessu ári. Stofnunin hafi þar að auki ekki upplýsingar um að slíkir flutningar hafi farið fram á vegum íslenskra flugrekenda.

Hafa lengi deilt um yfirráð Nagorno-Karabakh

Armenía og Aserbaídsjan hafa lengi deilt um yfirráð í Nagorno-Karabakh í Kákakusfjöllum en stillt var til friðar með samkomulagi árið 1994. Rússar, Frakkar og Bandaríkjamenn hafa haft frumkvæði að því að miðla málum á milli ríkjanna síðan.

Héraðið er landlukt svæði á milli ríkjanna sem sem tilheyrir Aserbaídsjan formlega. Því er þó stjórnað af armenskum aðskilnaðarsinnum.

Átök hófust að nýju þann 27. september. Hundruð hafa fallið og þúsundir hafa þurft að flýja heimili sín.

Eins og áður segir flutti Icelandair hjálpargögn fyrir Armenia Fund í Los Angeles. Eitt stærsta samfélag brottfluttra Armena má finna í Kaliforníu. Þúsundir hafa komið saman við ræðismannsskrifstofu Aserbaídsjan í Los Angeles og mótmælt átökunum á milli ríkjanna.

Samkvæmt frétt LA Times mótmæltu einnig tugir þúsunda við sendiráð Tyrklands í Beverly Hills á sunnudaginn.

Þá hafa bandarískir Armenar einnig hafið söfnun fyrir Armeníu.

Meðal frægustu einstaklinganna sem tilheyra þessu samfélagi Armena í Kaliforníu er Kardashian fjölskyldan. Kim Kardashian West tilkynnti til að mynda um helgina að hún hefði gefið Armenia Fund eina milljón dala.