Miklar skuldir forsetans sagðar ógna öryggi Bandaríkjanna

Donald Trump, Bandaríkjaforseti, er ábyrgur fyrir 421 milljón dala lánum. Gjalddagar flestra þessara lána eru á næstu fjórum árum. Ofan á það bætist svo hundrað milljón dala fasteignaveð sem rennur út árið 2022. Andstæðingar forsetans segja skuldir hans ógna öryggi Bandaríkjanna og gera hann berskjaldaðan gegn kúgun og öðru.

New York Times birti í gær frétt sem byggir á skattagögnum forsetans sem spanna tvo áratugi. Trump hefur lengi reynt að koma í veg fyrir að almenningur, þingmenn og saksóknarar komi höndum yfir gögn sem þessi.

Meðal annars kemur fram í gögnunum að Trump hafi einungis greitt 750 dali í alríkistekjuskatt árið 2016, þegar hann náði kjöri til embættis forseta. Þá er greint frá því að tíu af síðustu fimmtán árum hafi Trump ekki greitt neinn tekjuskatt, þar sem upplýsingar sem hann gaf upp til skattsins bentu til þess að hann tapaði meiru en hann þénaði.

Sjá einnig: Segja Trump hafa greitt samtals 1.500 dollara í tekjuskatt á tveimur árum

Trump sagði sjálfur í gærkvöldi að þessar fréttir væru rangar. Hann hefði borgað mikla skatta. Hélt hann því einnig fram, eins og svo oft áður, að hann geti ekki opinberað skattskýrslur sínar vegna þess þær séu til skoðunar hjá Skattinum. Hann hefur haldið þessu fram í rúm fjögur ár.

Samkvæmt NYT er Skatturinn að rannsaka 72,9 milljón dala endurgreiðslu sem Trump fékk árið 2010. Þetta hafði hann greitt á árunum 2005 til 2008. Árin 2008 og 2009 sagðist Trump hafa tapað 1,4 milljarði dala.

Deilur Trump og Skattsins virðast snúast um þetta.

Trump er fyrsti bandaríski forsetinn frá því Richard Nixon var í embætti sem hefur neitað að opinbera fjármál sín.

Veita ekki öryggisheimildir vegna skulda

Ekki liggur fyrir hverjum forsetinn skuldar þessar hundruð milljóna dala en sú uppljóstrun hefur þegar vakið upp spurningar um öryggi. Leyniþjónustur Bandaríkjanna neita til dæmis fólki sem skuldar miklar upphæðir um heimild til að skoða leynilegar upplýsingar, vegna þess að utanaðkomandi aðilar geti auðveldlega haft áhrif á viðkomandi vegna skuldanna. Skuldir geri þau að öryggishættum.

Til dæmis um þetta má benda á Jared Kushner, tengdason Trump og hans helsta ráðgjafa. Forsvarsmenn erlendra ríkja hafa reynt að hafa áhrif á hann og þá meðal annars vegna viðskiptahagsmuna hans og fjárhagserfiðleika.

Uppljóstrari hefur haldið því fram að tekið hafi verið fram fyrir hendurnar á sérfræðingum varðandi öryggisheimildir í ríkisstjórn Trump. Minnst 25 manns, sem hafi verið hafnað af sérfræðingum, hafi svo fengið öryggisheimild vegna inngripa embættismann. Þeirra á meðal eru Kushner og Ivanka Trump, dóttir forsetans.

Trump sjálfur skipaði John Kelly, þáverandi starfsmannastjóra sínum, að útvega Kushner örygisheimild.

Segir Trump hafa notað skattkerfið til að stela

Bill Pascrell, þingmaður Demókrataflokksins, hefur leitt viðleitni þingmanna til að koma höndum yfir skattagögn Trump, sem hann hefur barist gegn af mikilli hörku. Pascrell sagði um fregnirnar í gær að fréttir NYT staðfesti þeirra verstu ótta.

Trump hafi allt sitt líf misnotað skattkerfið til að ljúga, svindla og stela í stórum stíl.

Þar að auki sakar Pascrell Trump um að hafa stolið frá hinu opinbera til að bæta upp fyrir tap sitt og segir hann einnig að forsetinn sé verulega berskjaldaður gagnvart kúgun og áhrifum annarra ríkja vegna skulda hans.

Frá því Trump settist að í Hvíta húsinu, í janúar 2017, hafa málafylgjumenn, áhrifamenn og erlendir erindrekar varið gífurlegum upphæðum á hótel Trump og í öðrum fyrirtækjum hans.

Til marks um það hafa tekjur Mar-a-Lago, einkaklúbbs Trump í Flórída aukist um fimm milljónir dala á ári frá 2015. Mun fleiri menn hafi gerst meðlimir í klúbbnum.